भांगरभूंय | प्रतिनिधी
वार्क्यां घराचेर पडलें झाड, आक्यां राखणे वण्टीचेर पडलो माड
मडगांव: पावसा सयत वादळी वाऱ्याक लागून झाडां पडपाच्यो घडणुको सोमाराय साश्ट म्हालांत सुरूच आशिल्ल्यो. वार्क्यां लीना हावजा कुशीच्या घरा सयत रस्त्यार झाड पडलें. हातूंत घराचें सुमार 35 हजारांचें लुकसाण जालें. मडगांव उजो पालोवपी दळान सुमार देड लाखांचो म्हालवज वाटायलो. तशेंच मांडोप नावेली वाठारांत मोटारीचेर झाड पडून पांच हजारांचें लुकसाण जालें.
साश्ट म्हालांत ह्या वर्सा मॉन्सून काळांत झाडां पडपाचे प्रकार वाडल्यात. दीसपट्टे घरांचेर, राखणे वण्टींचेर, मोटारींचेर, रस्त्यांचेर झाडां पडून लुकसाण जावपाचे प्रकार घडत आसात. मडगांव उजो पालोवपी दळा कडल्यान मेळिल्ले म्हायती प्रमाण वार्क्यां घराचेर झाड पडपाची घडणूक दनपारां 3.15 वरांचेर घडली. हे घडणुकेंत सुमार 35 हजारांचें लुकसाण जालें. मडगांवां रस्त्यार झाडाचो व्हड खांदो पडलो. सिरली हांगा कपेला कुशीक रस्त्यार झाड पडून येरादारीची कोंयडी जाली.
आकें मडगांवां कॉस्ता फॅक्टरी कुशीचे फाटले वटेन माड राखणे वण्टीचेर पडून सुमार पांच हजारांचें लुकसाण जालें. जाल्यार 20 हजारांचो म्हालवज वाटायलो.
मांडोप नावेली हांगा पिंपळाचें झाड डिझायर मोटारीचेर काल दनपारां तीन वरांचेर पडलें. हातूंत पांच हजारांचें लुकसाण जालें जाल्यार 20 हजारांचो म्हालवज वाटावपाक येस आयलें. तशेंच तळावली वाठारांत रस्त्यार झाड पडपाची घडणूक सांजवेळा पावणे चार वरांचेर घडली. उजो पालोवपी दळान झाड कुशीक काडून येरादारी सुरळीत केली.
माजोड्ड्यां कुरिलोवाडो वाठारांत ट्रिनेटी फर्नांडीस हांच्या घरा मुखार पणसाचें झाड पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
