भांगरभूंय | प्रतिनिधी
गोवा कॅनान दक्षीण गोंय जिल्होधिकाऱ्याक धाडलें पत्र
मडगांव: दक्षीण गोंयांतले दर्या, घसघशे, तळयो अशा विवीध सुवातांनी थळाव्यां सयत पर्यटकूय बुडपाच्यो घडणुको घडल्यात. हे फाटभुंयेर गोवा कॅना कडल्यान दक्षीण गोंय जिल्होधिकाऱ्याक पत्र धाडून बुडपाच्यो घडणुको जावच्यो न्हय हे खातीर मार्गदर्शक तत्वां तयार करून आदेश जारी करपाची गरज आशिल्ल्याचें मत उक्तायलें.
संवसारीक बुडपा पसून प्रतिबंधक दीस 25 जुलय दिसा मनयतात. ह्या दिसाचें औचित्य सादून गोवा कॅनाचे रोलंड माटिन्स हांणी दक्षीण गोंयचे जिल्होधिकारी आनी आपत्कालीन वेवस्थापनाचे मुखेली ए. अश्वीन चंद्रू (आयएएस) हांकां पत्र धाडून बुडपाच्या घडणुकांनी वाड जायत आशिल्ले खातीर हुस्को उक्तायिल्लो.
पावसाच्या दिसांनी घसघशे, तळयो, न्हंयो, झरे, खणीचे फोंड हांकां थळावे आनी पर्यटक भेटी दितात. हातूंत खूबशे फावटी बुडपाच्यो घडणुको घडटात. जिल्हो आपत्ती वेवस्थापन प्राधिकरणा कडल्यान दक्षीण गोंयांतल्यो बुडपाच्यो घडणुको उण्यो जावपा खातीर भौशीक सुरक्षिततायेच्या हिता खातीर मनशाक बुडपा पसून वाटावपा खातीर कार्यावळ आयोजीत करपाची गरज आसा.
बुडपाच्या घडणुकांची गंभीर दखल घेवन मार्गदर्शक तत्वां आनी नेमां विशीं पत्रक तयार करचें आनी ताची उजवाडावणी वॅबसाटी सयत हेर कडेनूय करची. मार्गदर्शक तत्वांक पाळो दिल्यार बुडपाच्यो घडणुको उण्यो जातल्यो अशेंय गोवा कॅनान पत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
