भांगरभूंय | प्रतिनिधी
कामकाजाचेर जाता परिणाम
म्हापशें: नगरपालिकेचे मुख्याधिकारी अमितेश शिरवयकार हे फाटल्या दोन म्हयन्यां परस चड काळा सावन रजेर आसात. कायमस्वरुपी मुख्याधिकाऱ्याच्या उणावाक लागून पालिकेचे म्हत्वाचे प्रकल्प भिजत पडिल्ल्यान ताचो कामकाजाचेर परिणाम जायत आसा.
पालिका मुख्याधिकारी अमितेश शिरवयकार हे फाटल्या 15 मे सावन रजेर आसात. पयलीं ते 15 दीस पितृत्व रजेर गेल्ले. उपरांत 1 जून सावन ते अनिश्चीत काळा खातीर रजेर आसात. दर आठ-पंदरा दिसांनी ते रजा वाडयत आशिल्ल्यान ते म्हापशें पालिकेंत परतून रुजू जातले हाची खात्री नाशिल्ल्याची चर्चा सद्या पालिका कचेरेंत सुरू आसा.
फाटल्या म्हयन्याभरा सावन चंद्रकांत शेटकार हे पालिका मुख्याधिकारी पदाचो अतिरिक्त ताबो सांबाळटात. शेटकार हे दर सोमार, बुधवार आनी शुक्रार अशे सप्तकांतले तीन दीस पालिका कचेरेंत हाजीर आसतात. पूण पूर्णवेळ मुख्याधिकारी नाशिल्ल्यान पालिका मंडळांतल्या नगरसेवकांक प्रभागांतल्या सदच्या कामा खातीर कामगार वर्ग उणो पडटा. कंत्राटी कामगार घेवपा खातीर पालिका मंडळाक सल्लो दिवपा खातीर पूर्णवेळ मुख्याधिकारी नात. तशेंच आमदार विधानसभा अधिवेशनांत व्यस्त आशिल्ल्यान हे कामगार घेवप पालिकेक शक्य जायना.
तशेंच पालिका मंडळान शारांतल्या सगल्या विसूय प्रभागांतलो घरा कणकणीं कोयर एकठांय करपाची जापसालदारकी खाजगी कंत्राटदाराचेर सोंपोवपाचो निर्णय घेतिल्लो. हे येवजणेची फायल फाटले स म्हयने नगरपालिका संचालनालयाचे कचेरेंत मंजुरी खातीर पडून आसा.
पूर्णवेळ मुख्याधिकाऱ्याच्या उणावाक लागून फायलींची फाटपुरवण जायनाशिल्ल्यान ही फायल संचालनालयाचे कचेरेंत आडकून उरल्या. हाका लागून शारांतल्या कोयर संकलनाचेर परिणाम जाला.
म्हापशें पालिकेचेर सत्ता स्थापन करपा वेळार मुख्यमंत्री आनी थळाव्या आमदारान हमी दिल्ली की, शाराचो विकास जलदगतीन जातलो आनी पालिकेचेर पूर्णवेळ मुख्याधिकारी आसतलो. पूण हें आस्वासन पाळिल्लें ना. तशेंच गोंयांतल्या हेर पालिकां व्यतिरिक्त म्हापशें पालिकेक सदांच वेगळी वागणूक मेळटा. पूर्णवेळ मुख्याधिकारी दिवपाचें जें आस्वासन दिल्लें ताची जापसालदारकी आतां कोण घेतलो हाचें स्पश्टीकरण सरकारान दिवचें अशी मागणी नगरसेवक अॅड. शशांक नार्वेंकार हांणी केल्या.
बडटी आनी सेवेंत कायम करपाच्या नांवा खाला कांय म्हयन्यां पयलीं उत्तर गोंयांतले एके पालिकेंत लिंगीक अत्याचाराचो प्रकार घडिल्ल्याची चर्चा गोंयभर पातळिल्ली. ताका लागून उत्तर गोंयांतलीं सगलींच नगरपालिका मंडळां आनी अधिकारी दुबावाच्या चपक्यांत सांपडिल्ले. उपरांत हें प्रकरण आपले भितर मिटयिल्ल्यान ताचो गाजोवाजो जावंक नाशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
