साळांतल्या लोकांक मेळटली थाकाय
भांगरभूंय | प्रतिनिधी
हुंवारांत उदक भरचें न्हय, म्हणून करतले उपाय
भांगरभूंय । प्रतिनिधी
पणजी : दिवचल मतदारसंघांतल्या साळ गांवांत हुंवार येवन उदक भरचें न्हय, म्हणून साळ न्हंयेचो गाळ उसपपाची येवजण आसा. उपरांत न्हंयेच्या पात्रा कडेन राखणे वणत उबारपाचो प्रस्ताव आसा. हाका लागून न्हंयेचें पात्र व्हड जातलें आनी उदक भायर येवचें ना, अशें उदका पुरवण मंत्री सुभाष शिरोडकार हांणी सांगलें.
दिवचलचे आमदार चंद्रकांत शेट्ये हांचे लक्षवेधी सुचोवणेचेर उदका पुरवण खात्याच्या मंत्र्यांनी ही जाप दिली. व्हडलो पावस पडलो काय साळात हुंवार येता. 2021 वर्सा हुंवार येवन घरांनी उदक भरिल्लें. हाचेर उपाय येवजण करपाची मागणी आमदार डॉ. चंद्रकांत शेट्ये हांणी केली.
तिलारी धरण भरलें काय तातुंतलें उदक न्हंये वटेन साळांत येता. भरती वेळार उदक सोडचें न्हय, अशें आदेश तिलारी धरणाच्या अधिकार्यांक दिल्या. हाका लागून भरती वेळार न्हंयेन चड उदक जावचें ना, हाची जतनाय सरकार घेता, अशें मंत्री शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
