‘दृश्टी’ जीवरक्षकांनी स म्हयन्यांत 317 जाणांक दिलें जीवदान

भांगरभूंय | प्रतिनिधी

सांडिल्ल्या भुरग्यांच्यो 107 कागाळी सोडयल्यो

पणजी: ‘दृश्टी’ जीवरक्षकांनी जानेवारी ते जून 2023 ह्या स म्हयन्यांत 317 जाणांक जीवदान दिलें. हातूंत उदकांतल्यान वाटावप, वैजकी उपचार, सुरक्षितताये खातीर मजत, प्रथमोपचार आनी सांडिल्ल्या भुरग्यांक वाटायल्ल्याचो आसपाव आसा. ह्या स म्हयन्यांनी दर दिसा एक तरी घडणूक घडिल्ल्याचें स्पश्ट जालां.
वाटायिल्ल्या 317 जाणां मदीं 107 सांडिल्ल्या भुरग्यांच्यो कागाळी आशिल्ल्यो. तांकां जीवरक्षकांनी सोदून पालकांचे सुवादीन केलीं. ‘दृश्टी’न पुराय गोंयांत सुमार 466 जीवरक्षक दवरल्यात.
अहवाला प्रमाण, जानेवारीत 43 जाणांक वाटायले, फेब्रुवारींत 35 आनी एप्रीलांत 29 जाणांक वाटायले. नोंद जाल्ल्या वांटावपाच्या कामांत 46 थळावे, 262 भारतीय आनी 26 परदेशी पर्यटक आशिल्ले. आतां मेरेन तीग जाणांक बुडून मरण आयलां. 12 ते 18 पिरायेचे आनी ताचे सकयले पिरायेच्या वट्ट 114 जाणांक जीवरक्षकांनी वाटायल्यात. वाटायल्ले हेर 111 व्यक्ती 19 ते 25 पिराये मजगतींचे आशिल्ले. जाल्यार 101 जाण 35 ते 45 मजगतींचे पिरायेचे आशिल्ले.
कळंगुटे दर्या देगेर ह्या पयल्या स म्हयन्यांत सगळ्यांत चड जीव वाटावपाच्यो घडणुको घडल्यात. हांगा आतां मेरेन 73 घडणुकांची नोंद जाल्या. जाल्यार बागा 52, मोरजी 21, वागातोर 18, कांदोळे 15 आनी अंजुना 13 घडणुककांची नोंद जाल्यात. तशेंच पाळोळें आनी कोलवा दर्यादेगेर सुमार 31 आनी 25 वाटावपाच्यो घडणुको नोंद जाल्यात.
अंदूं जानेवारी ते जून ह्या काळांत, बेपत्ता भुरग्यांच्यो 107 घटणुको घडल्यो. विशेश म्हळ्यार अल्पवयीन भुरगीं तांच्या कुटुंबा पसून वेगळीं जाले उपरांत पयलीं जीवरक्षकां कडेन वतालीं. ‘दृश्टी’ मरीनचे अलर्ट टिमीन हे विशीं रोखडीच दखल घेवन सांडिल्ल्या भुरग्यांक पालकांचे सुवादीन केले.
मे म्हयनो जीवरक्षकां खातीर सामको व्यस्त म्हयनो. ह्या म्हयन्यांत 41 भुरगीं सांडिल्ल्याच्यो घडणुको नोंद जाल्ल्यो. कळंगुटे सगळ्यांत चड म्हळ्यार 46 भुरगीं साडिल्लीं. उपरांत बागा 29 आनी कोलवा 18 घडणुको घडल्यो.