तीन म्हयन्यांत कावलां अड्डे धोरण
भांगरभूंय | प्रतिनिधी
राज्यांत 380 बेकायदा कावलां अड्डे
भांगरभूंय । विधानसभा खबर
पणजी : राज्यांत 380 बेकायदा कावलां (स्क्रॅप यार्ड) अड्डे आसा. तीन म्हयन्यां भितर सरकार कावलांचें धोरण तयार करतलें, अशें मुख्यमंत्री डॉ. प्रमोद सावंत हांणी सांगलां.
भाजपा सरकार गोंयांत कांवला अड्ड्यांक उर्बा दिता. लोकांचे जीव आतां देवाचे दयेर अवलंबून आसात, कारण सरकारान ह्या अड्ड्यां कडेन आडनदर केल्या. धोक्याचो कोयर, उजो लागूं येता अश्या वस्तूंचो सांठवण आनी येरादारीचेर नियंत्रण दवरपाक कसलीच सरकारी यंत्रणा ना, अशी टिका विरोधी पक्ष फुडारी युरी आलेमांव हांणी केली.
ताचेर जाप दितना मंत्री बाबुश मोन्सेरात हांणी सांगलें : सरकार कांवला अड्डो धोरण तयार करता. सध्या ताची प्रक्रिया चलता. ११७ कांवला अड्डे उत्तर गोंयांत आनी २१० द. गोंयांत आसात. भोवतेक अड्डे परवानगी घेनासतना चलतात.
राज्यांत बरीच बेकायदा कावलां अड्डे आसात. ते माफिया सारके वागतात, असो आरोप विरोधी पक्ष फुडारी युरी आलेमाव हांणी केलो.
बेकायदो कावला अड्ड्यांचेर कारवाय करपाक सरकारान सुरवात केल्या. जे बेकायदा कावलां अड्डे वीस वर्सां सावन आसा. तांकां नोटीसो जारी करपाक सुरवात जाल्या, अशें मुख्यमंत्र्यानी सांगलें.
युरी आलेमांव हांणी सांगलें, ६९९ कांवला अड्डे आसात, तातूंतले ६८६ बेकायदेशीर आसात. चडशे कोमुनिदाद जमनीचेर आनी लोकवस्तीं लागसार आसात. ह्या कांवला अड्ड्यांनी १ लाख ५८ हजार चौ. मिटर जमनीचेर अतिक्रमण केलां.
कावलां अड्ड्यां मदीं स्फोट जाता. केन्ना केन्ना उजो लागता. स्फोट वा उजो लागचो न्हय देखून सरकार कितें उपाय येवजण करता? असो प्रस्न बाणावलेचे आमदार वेंझी व्हिएगस हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
