भांगरभूंय | प्रतिनिधी
जुलयांत दिसाक सरासरी अडेच इंच पावस
भांगरभूंय । प्रतिनिधी
पणजीः उण्या दाबाच्या पट्ट्याक लागून फाटल्या सप्तका सावन सुरू जाल्लें पावसाचें धुमशेण आयतारा लेगीत चालूच आशिल्लें. घरांचेर झाडां पडपा सयत रस्त्याचेर झाडां पडिल्ल्यान लोकजीण विस्कळीत जाली. आतां मेरेन राज्यांत इंच पावस जाला. तातूंतलो जुलयांतलो पावस ५७ इंच आसा. सरासरीचो विचार केलो जाल्यार जुलयांत दिसाक सरासरी अडेच इंच पावस पडला.
हवामान खात्यान 26 जुलय मेरेन ऑरेंज अॅलर्ट जारी केला. 27 जुलयाक येलो अॅलर्ट आसा. इतलो तेंप सांगें, केपें वाठारांत पावसाचें प्रमाण चड आशिल्लें. फाटल्या दोन दिसांत सांखळी आनी वाळपय वाठारांत पावसाचें प्रमाण चड आसा.
राज्यांत 11 जूनाक मॉन्सून पाविल्लो. मॉन्सून येवन लेगीत पयले धा ते बारा दीस पावस नाशिल्लो. पावसाची तूट 50 टक्क्यां परस फुडें गेल्ली. 23 जूना उपरांत पावसान नेट धरलो. 28 जूनाक 142.5 मिमि (साडे पाच इंच) पावसाची नोंद जाली. अंदूं आतां मेरेन दिसाचो हो सगळ्यांत चड पावस आसा. जूनात 655 मिमि म्हणल्यार 26 इंच पावस पडलो. जून सोंपपाक सुरू जाल्लो पावस सेगीत पडत आसा. आतां मेरेन 209.5 मिमि (82.61 इंच) पावस जाला. जूनांतलो पावस वजा केलो जाल्यार जुलयांतलो पावस 57 इंच जाता. जुलयांत दिसाक सरासरी अडेच इंच पावस पडला. ह्या दोन दिसांनी सांखळे आनी सत्तरींत पावस पडटा, तरी एकंदरीत सांगें आनी केपें वाठारांत चड पावस पडला. सांग्या वयलो पावस 92 इंच जाल्यार केप्याचो पावस 87 इंच जाला. पावसाक लागून धरणा उपाट भरून व्हांवपाक लागल्यात.
मजगतीं, लोंडा वाठारांत नव्यान बांदिल्लो पूल कोसळिल्ल्यान गोंय- बेळगांव मार्गा वयली येरदारी बंद जाल्या. पर्यायी रस्त्या वयल्यान येरादारी घुंवडायल्या.
आतां मेरेन सांग्यार 2343 मिमि (92.24 इंच) पावसाची नोंद जाल्या. सांगें उपरांत केप्यां सगळ्यांत चड पावस पडला.
उटंगाराच्या पावसाची शिटकावणी
गोंय आनी कोंकण वाठारांत 27 जुलय मेरेन घोग्यांनी पावस पडपाची शिटकावणी हवामान खात्यान दिल्या. पावसाचें प्रमाण 115.6 मिमि ते 204.4 मिमि इतलें आसपाचो अदमास आसा. कोंकण, गोंय आनी कर्नाटकाच्या खोलगट वाठारांत हुंवार येवपाचो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
