भांगरभूंय | प्रतिनिधी
भांगरभूंय । मेगन दे सौजा
पणजी ः गोंय विद्यापीठांतल्या शणै गोंयबाब भाशा आनी साहित्य महाशाला, कोंकणी अध्ययन शाखेन शुक्रारा 31 व्या कोंकणी सरस्पत मंडळ 2023 – 2024 चो उक्तावण सुवाळो आयोजीत केलो. हे कार्यावळीक मुखेल सोयरी म्हूण कोंकणी सरस्पत मंडळाची आदली अध्यक्ष आनी कोंकणी शिक्षक विमल नागवेंकार लाबिल्ली.
कार्यावळीक शणै गोंयबाब भाशा आनी साहित्य महाशालेची अधिष्ठाती प्रो. अनुराधा वागळे तशेंच संशोधनाचे उप अधिष्ठाते डॉ. प्रकाश पर्येंकार हाजीर आसले.
एम- ए कोंकणीच्या भाग दोनाच्या विद्यार्थ्यांनी येवकार गितांतल्यान कार्यावळीची सुरवात केली. मानेस्तांनी दीप प्रज्वलन करून कार्यावळ मुखार व्हेली. मंडळाची संयोजक, सवायक प्रा. सानिका गाांवकार हांणी येवकाराचें आनी प्रास्तावीक उलोवप केलें. डॉ. पर्येंकार हांणी मनोगत उक्तायलें. चित्रा दलाल हांणी मुखेल सोयऱ्यांक फुलांचो रोंपो भेटयलो. विमल नागवेंकार हांणी आपल्या उलोवपांत कोंकणी भाशेंत आशिल्ल्या साहित्याच्या वाचनाचेर भर दिवन कोंकणी भाशेची गिरेस्तकाय पटोवन दिली. मंडळाच्या संपादक मंडळान तयार केल्ल्या वण्टीपत्रकाचें अनावरण मुखेल सोयऱ्यांच्या हस्तुकीं जालें.
मानेस्तांनी मंडळाच्या कार्यकर्त्यांक तांचें नांव कोरांतिल्लो पदाचो बिल्लो दिलो आनी मंडळाच्या नव्या वाांगड्यांची स्थापणूक केली. मंडळाचे अध्यक्ष पलाश अग्नी हांणी वर्सभर जातल्या कार्यावळींची घोशणां केली.
प्रो. अनुराधा वागळे हांणी मुखेल सोयऱ्यांक भेट वस्तू दिवन तांचे उपकार मानले. निमाणे कडेन उलयतना प्रो. वागळे हांणी भो- भाशीक सभ्यतायेक वयलो पांवडो दिवन अणकाराची गरज आनी ताच्या म्हत्वाचो दिश्टावो घडयलो.
सुत्रसंचालन प्राजक्ता गांवकार आनी राणी कामत हांणी केलें. उपकाराचें उलोवप सचीव वैभव माजाळीकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
