भांगरभूंय | प्रतिनिधी
उल्हास तुयेंकार : दवर्ली- दिकरपाल पंचायती सुरू केली एमआरएफ सुविधा
भांगरभूंय । प्रतिनिधी
मडगांव : दवर्ली- दिकरपाल वाठारांतल्या कोयराचेर प्रक्रिया सुरू करपाक शेड उबारल्या. तशेंच सद्दां गांवांतलो कोयर उखलप, कोयर एकठांय आसल्यार तो वेगळो करप हे गजाली कडेनूय आतां लक्ष दितले. दवर्ली गांवांत ह्यान पयलीं रस्त्या कुशीक आनी उक्ते सुवातेर कोयर उडयताले. आतां अशे तरेच्यो गजाली उण्यो जातल्यो, असो विस्वास आमदार उल्हास तुयेंकार हांणी उक्तायला.
दवर्ली- दिकरपाल पंचायती वतीन मटेरिअल रिकव्हरी फॅसिलिटी (एमआरएफ) सुविधा उबारल्या. तिचें उक्तावण आयज आमदार उल्हास तुयेंकार, आमदार क्रुझ सिल्वा हांचे हस्तुकीं जालें. ह्या वेळार दवर्लीचे सरपंच हर्क्युलानो निस्साओ, जिल्हो पंचायत वांगडी परेश नायक आनी पंच हाजीर आशिल्ले.
आमदार तुयेंकार हांणी दवर्ली- दिकरपाल पंचायतीच्या एमआरएफ सुविधेचें उक्तावण केलां. आतां हे शेडी मेरेन येवपी रस्तो बेगीनूच तयार करून दिवचो. अशें केल्ल्यान फायदो जातलो. तशेंच ओव्हरब्रीजा खातीर कांय जागो संपादीत करपाचो उरला. होय प्रस्न आमदार तुयेंकार हांणी सोडोवचो. ही एमआरएफ शेड आनी मशिना खातीर 1.10 कोटींचो खर्च जाला, अशी म्हायती सरपंच हर्क्युलानो निस्साओ हांणी दिली.
एकवटान उदरगत करपाची गरज: सिल्वा
सगळ्यांनी एकठांय येवन गांवची उदरगत करपाची गरज आसा. तशेंच दवर्ली गांवांतलें पंचायत मंडळ, आमदार, जिल्हो पंचायत वांगडी आनी आदल्या वांगड्यांनी बरेच यत्न केल्यात. हांगचो कोयराचो प्रस्न रोखडोच सुट्टलो. वेळ्ळी मतदारसंघातल्या असोळण्यां एमआरएफ शेड बांधकाम सुरु आसा. आंबेली शेड उबारल्या पूण तिचें उक्तावण उरलां. कांय सुवातांचेर एमआरएफ शेड उबारतना आडखळी येतात. दरेका पंचायत वाठारांत एमआरएफ शेड उबारल्यार आनी कोयराचो विलो बरे तरेन लायल्यार राज्यांतली कोयराची समस्या सुट्टली अशें आमदार क्रुझ सिल्वा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
