भांगरभूंय | प्रतिनिधी
भांगरभूंय । प्रतिनिधी
वाळपय: फाटल्या चार दिसां सावन पडपी उटंगाराच्या पावसाक लागून सत्तरी म्हालांतल्या घरांचें, मालमत्तेचें बरेंच लुकसाण जालां. फाटल्या चार दिसांनी तीन घरां कोसळ्ळ्यांत. आयतारा सकाळीं पिसुर्ले पंचायत वाठारांतल्या पणशे गांवांतलें रेश्मा सुरेश गावडे हांचें घर कोसळ्ळें. ताका लागून ह्या कुटुंबा मुखार व्हड समस्या निर्माण जाल्या.
गावडे हांचें मातयेचें घर आशिल्लें. तें आयतारा कोसळ्ळें. ह्या कुटुंबाची अर्थीक परिस्थिती सामकी वायट आशिल्ल्यान हें कुटूंब फाटल्या कितल्याशाच वर्सां सावन मातयेच्या घरांत रावतालें.
मजगतीं, हे विशीं म्हायती मेळटांच सरपंच देवानंद परब हांणी घडणुके सुवातेर वचून पळोवणी केली. ह्या वेळार तांणी रेश्मा गावडे हांचे कडेन चर्चा केली. ह्या कुटुंबाक मजत दिवपाचो पुरायेन यत्न करतलों अशें परब हांणी सांगलें.
रेश्मा गावडे हांणी सरकारान आपल्या कुटुंबाक मजत करची अशी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
