भांगरभूंय | प्रतिनिधी
कार्लोस फेरेराः अर्थसंकल्पाचेर विरोधकांची टिका, सत्ताधारी आमदारांची तोखणाय
भांगरभूंय । प्रतिनिधी
पणजी : रस्ते तशेंच तरेकवार प्रकल्पां खातीर जे सल्लागार नेमल्यात ते एजंट जाल्यात, असो आरोप आमदार कार्लोस फेरेरा हांणी केला. सल्लागार नेमपाची पद्दत बंद करून खात्यां मदल्या तज्ज्ञां वरवीं कामां करपाक जाय, अशी मागणी कार्लोस फेरेरा हांणी केली.
मुख्यमंत्री डॉ. प्रमोद सावंत हांणी सादर केल्ल्या अर्थसंकल्पाचेर चर्चा सुरू आसा. सत्ताधारी आमदारांनी अर्थसंकल्पाची तोखणाय केली जाल्यार विरोधकांनी टिका केली.
सगळ्या प्रकल्पां खातीर तशेंच कामां खातीर सल्लागार नेमपाची पद्दत सुरू आसा. हे सल्लागार बरेच पयशें घेतात. पयलीं आराखडो तयार करून कामां जातालीं. हीच पद्दत सुरू करपाक जाय. सल्लागार नेमपाची पद्दत बंद जावपाक जाय.
अर्थसंकल्पांत तजवीज केल्लो निधी प्रत्यक्षांत खर्च जायना. कार्यवाय करप शक्य आसा, असो अर्थसंकल्प सादर जावपाक जाय. मुख्यमंत्री देवदर्शन येवजणे खातीर 10 कोटींची तजवीज आसा. आतां मेरेन अर्ज केल्ले 10 हजार लोक देवदर्शनाक केन्ना वचपाक मेळटलें, ताची वाट पळयतात. हे येवजणे खातीर 10 कोटीं पावचे नात. अर्थसंकल्पांत तजवीज केल्लो निधी खर्चा खातीर उपलब्ध जातलोच, हाची हमी ना, अशें कार्लोस फेरेरा हांणी सांगलें. खणी बेगीन सुरू जावपाची शक्यता ना. हाका लागून तजवीज केल्लो निधी उपलब्ध जावप कठीण आसा, अशें तांणी सांगलें.
तालांव दिवपी पुलिसांचेर नदर दवरचीः डिलायला लोबो
येरादारी नेम मोडप्यांचेर कारवाय करपाची कार्यवाही नेटान सुरू आसा. येरादारी नेमाच्या नांवा खाला पर्यटकांची सतावणूक जाता. दंड दिवपी येरादारी पुलिसांचेर नदर दवरपाची मागणी आमदार दिलायला लोबो हांणी केली. सगळ्या खात्यां खातीर अर्थसंकल्पांत भरीव तजवीज आशिल्ल्याचो उल्लेख तांणी केलो.
जित आरोलकार हांणी मांडलो उदकाचो प्रस्न
मांद्रें मतदारसंघांत गिमांत उदकाचो उणाव जाणावता. अंदूं लोकांक 8 दीस उदक नाशिल्लें. मांद्रें मतदारसंघा खातीर 30 एमएलडी प्रकल्पाचें काम सुरू आसा. हो प्रकल्प बेगिनात बेगीन पुराय जावचो, म्हूण सरकारान यत्न करपाची मागणी आमदार जीत आरोलकार हांणी केली.
अर्थसंकल्पाचे कार्यवाही खातीर वेवस्थापन जाय
अर्थसंकल्पांत सगळ्या खात्यां खातीर भरीव तजवीज आसा. भरीव तजवीज आसली तरी अर्थसंकल्पाचे कार्यवाही खातीर योग्य तरेच्या वेवस्थापनाची गरज आसा, अशें मत आमदार वेंझी व्हिएगस हांणी मांडलें. अर्थसंकल्पा परस सरकाराची येणावळ उणीं आसा. हाका लागून कार्यवाही कठीण जातली, अशें वेंझी व्हिएगस हांणी भाशणात सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
