भांगरभूंय | प्रतिनिधी
जो आधुनीक विज्ञान- तंत्रज्ञाना कडेन इश्टागत करता ताचोच फुडार उज्ज्वल आनी समृद्ध जावपाक शकता. – हीं उतरां भारताचे पयले प्रधानमंत्री पंडित जवाहरलाल नेहरूंचीं, पूण फकत विचार सांगून ते ओगी बसलेनात. आपल्या विचारां कडेन तांणी आपलें आचरण दवरल्लें. आपल्या तत्वां कडेन ते सदांच प्रामाणीक रावले. जितली तांची लोकशायचेर निष्ठा आशिल्ली तितलीच आधुनीक विज्ञान- तंत्रज्ञानाचेर आशिल्ली. भारत देश विज्ञान- तंत्रज्ञानांत आत्मनिर्भर करपा खातीर तांणी अत्याधुनीक प्रयोगशाळा निर्माण केल्यो. तेच बराबर फावो तें विज्ञानीक मनीसबळ तयार करपाक आयआयटी, एम्स आदी शिक्षणीक संस्था उबारल्यो. ते भायर समाजांत विज्ञानीक दिश्टीकोन निर्माण करपाक देशाच्या संविधानांत ते तरेन तजवीज करून दवरली, पूण अपेक्षा केल्लीं तीं उद्दिश्टां साद्य जालीं नात. विज्ञानीक दिश्टीकोन तर पयसच उरलो. विज्ञानीक शिक्षणान समृद्ध जाल्ल्या तरणाट्या वर्गान तर पुराय निरशेणी केली. विज्ञान शिक्षण हें उपजिविकेचें एक बरें माध्यम इतले पुरतीच तांणी मोख दवरल्ली. एकदां आयआयटींत प्रवेश मेळ्ळो म्हणजे विदेशांत खंयची कंपनी बरो पगार दिता हाचेर पयलें संशोधन जातालें, अशें म्हणटात. सांगपाचें म्हणल्यार विज्ञान संशोधक संस्कार ह्या देशांत केन्नाच निर्माण जाले नात.
स्वातंत्र्य संग्राम हो परकी सत्ते आड लडो तर आशिल्लोच. तेच बरोबर समाज सुदारणा आनी समाज प्रबोधनाची चळवळ आशिल्ली. समाजीक क्रांती वांगडा आधुनीक विज्ञानीक क्रांती घडपाक लागिल्ली. विसाव्या शेंकड्यांत आधुनीक विज्ञानीक मळार अनेक नोबेल पारितोशीक लायकीचे सोद लागले. सी. व्ही. रमणाचो नोबेल पारितोशीक मेळोवपी सोद 1928 स लागलो. जगदीशचंद्र बोस, मेघनाद साहा, सत्येंद्रनाथ बोस, प्रशांतचंद्र महालनोबिस आदी जायत्या शास्त्रज्ञांचें काम त्याच काळांतले आसा. तशेंच स्वातंत्र्या उपरांत पंडित जवाहरलाल नेहरूंच्या विज्ञानीक धोरणांतल्यान प्रोत्साहीत जावन जायत्या शास्त्रज्ञांनी देशाचे उदरगतीक आदार दिलो. नेहरूंच्या काळांत विज्ञानीक प्रकल्प आनी उदरगतीच्यो संस्था आधुनीक देवळां म्हणून मान दिताले आनी देवळां इतलेंच तांचे पावित्र्य जपताले.
पूण आयज नेतृत्वाची उद्दिश्टां बदलल्यांत. देवळां राजकारण आनी सत्ताकारणाचो म्हत्वाचो वांटो जावपाक लागल्यांत. आदले राश्ट्रपती डाॅ. अब्दुल कलामान म्हणलां, ‘फुडली पिळगी आमी कितलीं देवळां बांदलीं हें विचारची ना. तर कितले कारखाने बांदले, संशोधन कामां खातीर कितल्यो साधन सुविधा उपलब्द करून दिल्यो. तशेंच कितलो निधी दिलो, हें विचारतली. पूण आयच्या फुडार्यां कडेन ते दिश्टीन कसल्योच येवजणी नात, कसलेंच धोरण ना. ज्या नेतृत्वा कडेन बरो फुडार घडोवपाची तांक नासता ते आपले अपयेस लिपोवपाक गरज नाशिल्ले दाखले दिवन समाजांत फूट घालपाचे यत्न करता. पूण ते फाटल्यान कितें डाव आसा हें कळपाक आमच्या समाजांतली बुदवंतकाय खंय उणी पडटा, होय महत्वाचो प्रश्न उबो रावता.
400- 500 वर्सां फाटीं जें कितें घडलें ताका दोश कोणाक दिवपाचो. ताचो बदलो म्हणून कोणाक दोशी धरतले. समाजीक नेमा प्रमाणें अश्या वादांत निमणें दुबळ्या गटाचोच बळी वता. फाटलो काळ आसूं वा आतांचो आसूं. अर्थीक नदरेन संपन्न वर्ग सदांच सुरक्षीत आसता.
लोक- कल्याणाचो विचार करपी नेतृत्व केन्नाच बदलो घेवपाची भाशा उलयना. सांगपाचें म्हणल्यार स्वातंत्र्या उपरांत पंडित नेहरून राष्ट्रकुल संघटनेंत वांटेकारी जावपाचो निर्णय घेतलो. स्वातंत्र्य संग्रामांत ब्रिटीश सरकाराच्या अत्याचारांचे घावे जिते आसनताय राष्ट्रकुल संघटनेंत कसो वांटो घेता. बीबीसीच्या टिव्ही वयल्या पयल्या मुलाखतींत एका प्रश्नाक जाप दितना नेहरू म्हणटात. ‘दुस्वासान विकास जायना. भारत स्वातंत्र्य चळवळी फाटली प्रेरणा हीच आसा.’
पूण आयच्या नेतृत्वाची ‘सोच’ बदलल्या. नवी देवळां आनी पुतळे बांदपाक तें फुडाकार घेता. पूण ते खातीर खर्यांनीच देव भक्ती आनी राष्ट्र भक्ती वाडटली व्हय? समाजा मदीं भावपण आनी मोग वाडटलो व्हय? समाजाची आनी देशाची अर्थीक उदरगत जातली व्हय? समाजांत शांती आनी मोग वाडोवन लोकांचे जिवीत सुखाचें जातलें व्हय? तशें आसल्यार एके वटेन बरेंच जालें म्हणूं येता. पूण आयज अश्या मुल्यांच्यो विचार जायना. जें सरकार अपेशी थारता तें लोकांची दिकाभूल करपाक अर्थ नाशिल्ल्या वादांत गुठलावन दवरपाचे यत्न करता.
आपलें अपेस धांपून दवरपाक फाटले राजवटीक दोश दीत बसल्यार राष्ट्राची उदरगत जातली व्हय? पंडित नेहरूंक दोश दीत बसले जाल्यार फुडाराचे प्रश्न सुट्टले व्हय? स्वातंत्र्य मेळ्ळें त्या तेंपार ब्रिटिशांनी भारताची परिस्थिती सामकीच दिवाळेखोर करून दवरिल्ली, पूण नेहरू केन्नाच ब्रिटिशांक दोश दीत बसले नात. अश्या परिस्थितींतय आपूण राष्ट्राची उदरगत करून दाखयतलों हें आव्हान आपणायलें. संवसारांतली सगलीं प्रगत राष्ट्रां भारता कडेन तुसडेपटान पळयतालीं. अशें आसतनाय पंडित नेहरून आपली बुदवंतकाय आनी मुत्सद्देगिरी वापरून भारतात अनेक आधुनीक शिक्षण संस्था सुरू केल्यो. तशेंच इस्रो आनी अणूशास्त्र संशोधन संस्था उबारल्यो.
दोन दिसांनी 27 मेक नेहरूंची पुण्यतीथ आसा. पंडित नेहरूंची कारकिर्द सोंपल्यार साठ वर्सां परस चड जालीं. तरी राष्ट्राच्या प्रत्येक घडणुकी फाटल्यान नेहरूंच्या कामाची याद जागी करता. चंद्रयान वा मंगलयान आसूं. हालींच सुरू जाल्ली कल्पक्कमची अणू भट्टी आसूं. दर घडणुके फाटल्यान पंडित नेहरूंची याद जाता. भारत देशाक आधुनिकतेची वाट दाखोवपी नेहरूंचें दायज कशेंच पुसून वचपाचें ना.
जगांतलें एक व्हड लोकशाय राष्ट्र आनी अनेक धर्म, जाती, भाशा, परंपरा आशिल्लो हो देश पं. नेहरून एकठांय बांदून दवरलो. धर्म सांप्रदायीक लोकांक नेहरूंच्या काळांत मान वयर काडपाक मेळ्ळी ना. त्या काळांतय तांचे कारनामे चालू आशिल्ले, पूण नेहरूंच्या प्रामाणीक आनी चारित्रवान गुणां मुखार ते फुडें येवपाक शकले नात. सद्या नेहरूंची प्रतिभा इबाडपाचें काम नेटान चालू आसा. नेहरूंचेर जितलो चिखोल शेंवटीतात वा फट, लोकांची दिकाभूल करपाचो प्रचार करपाचो यत्न करतात. तितलो नेहरू अदीक समजून घेवपाचो यत्न जाता. नेहरूंच्या वेगवेगळ्या तासांचो अभ्यास करून नवी पुस्तकां अजूनय प्रसिद्ध जायत आसात. निमाणें एकच सांगीन दिसता, नेहरूंच्या दुस्वासाच्या उज्यांत तांचें (नेहरूंचें) दायज केन्नाच लासून वचपाचें ना. पूण ह्या दुस्वासान देशाचो फुडार मात काळखांत वता. हाचेर विचार जावंचो.
विज्ञानदूत श्रीकांत शंभू नागवेंकार
9096512359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
