भांगरभूंय | प्रतिनिधी
नव्या शाळांक परवानगी दिवपाचो सरकारचो विचार नाः झिंगडे
पणजी : अंदूं शिक्षणीक वर्सांत शिक्षण खात्या कडेन अनुदानीत आनी बिगर अनुदानीत शाळा सुरू करपाक सुमार 100 अर्ज आयल्यात. पूण खात्यान अजून एकाय शाळेक परवानगी दिवंक ना. तशेंच नव्या शाळांक परवानगी दिवपाचो सरकाराचो विचार नाशिल्ल्याचे शिक्षण संचालक शैलेश झिंगडे हांणी सांगलें.
राज्यांत अनुदानीत आनी बिगरअनुदानीत शाळांची संख्या मोट्या प्रमाणांत आसा. बालरथा सयत हेर कांय सुविधा उपलब्ध करून शाळा विद्यार्थ्यांक आकर्शीत करतात. ताका लागून सरकारी शाळांतल्या विद्यार्थ्यांची संख्या उणी जावन जायत्या वाठारांतल्यो सरकारी प्राथमीक शाळा बंद करच्यो पडटात. माध्यमीक शाळांचीय अशीच स्थिती जाल्या. माध्यमीक वर्गांत उण्यांत 20 विद्यार्थी अासप गरजेचें. पूण कांय सरकारी शाळांच्या माध्यमीक वर्गांत फक्त 5 ते 6 विद्यार्थी शिक्षण घेतात, अशें चित्र आसा. ताका लागून हाचे मुखार अनुदानीत तशेंच बिगर अनुदानीत शाळांक परवानगी दिल्यार सरकारी प्राथमीक आनी माध्यमीक शाळांची अवस्था बाबत जावपाची शक्यताय आसा. ते खातीरूच अंदूंच्या शिक्षणीक वर्सांत नव्या शाळांक परवानगी दिवचे नात, असो निर्णय सरकारान घेतला. अंदूं आतां मेरेन एकाय शाळेक परवानगी दिवंक ना, अशें तांणी सांगलें.
बालरथांक लागून सरकारी शाळांक फटको
सरकारी प्रामथीक, माध्यमीक शाळांनी विद्यार्थ्यांक फुकट आनी दर्जेदार शिक्षण मेळटा. पूण अनुदानीत आनी बिगर अनुदानीत शाळांनी बालरथांची वेवस्था करून विद्यार्थ्यांक आपले कडेन अाकर्शीत करतात. 20 ते 30 किमि. अंतरा वयल्या विद्यार्थ्यांकूय बालरथा वरवीं हाडपाची आनी पावोवपाची वेवस्था ह्या शाळांनी केल्या. ताका लागून विद्यार्थी आनी पालकांनी लागसारच्या सरकारी शाळां कडेन अाडनदर केल्या, अशी खंत शैलेश झिंगडे हांणी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
