भांगरभूंय | प्रतिनिधी
गोंयचो आंवाठ ल्हान आसलो तरी हांगाची लोकसंख्या 16 लाखां वयर पावल्या. तातूंत पर्यटकांचें यो- वच आसता. ह्या सगल्यांचें वजें साधन- सुविधांचेर पडटा. गोंय पर्यटन थळ जाल्ल्यान फुडाराक आनीकूय लोक येतले. तांची रावपाची, खावपाची तजवीज आमकां करचीच पडटली. ताचे भायर सिवरेज, कोयर, लायटूय जाय. लायटीचे बाबतींत आमी शेजराच्या राज्यांचेर अवलंबून आसात. ते आमकां आनीकूय वीज दिवपाक तयार आसात. मात थंयच्यान ती गोंयांत हाडपाची आमची यंत्रणा दुबळी आसा. कोयर, सिवरेजीचो प्रस्नूय अदींमदीं तकली वयर काडटा. राज्यांत मांडवी, साळ, जुवारी, शापोरा, व्हाळवाट अश्यो साबार न्हंयो आसात. पूण ताचें उदक आतां उणें पडपाक लागलां. तेवटेन कांय हावके म्हादयक भेश्टावपाक लागल्यात. न्हंयांनी आसा तें उदक आमकां सांठोवन दवरपाक तरातरांचे उपाय घेवचेच पडटलें. कारण आतां मार्च लागलो काय उत्तर गोंयांत उदका खातीर दारादारांनी भोंवचें पडटा.
राज्यांतलो उदकाचो सांठो वाडोवपा खातीर फुडल्या 18 म्हयन्यां भितर 100 नवे बांद बांदपाची घोशणा उदकास्रोत खात्यान केल्या. म्हणल्यार म्हयन्याक 5 ते 6 बांद जाले. हें काम पावस सोंपतकच सुरू जावचें. ह्या बांदांनी उदक सांठून रावतलें आनी गिमाच्या दिसांनी सरभोंवतणच्या वाठारांनी उदकाची टंचाय जाता ती जावची ना. पूण, पावसाच्या दिसांनी तातूंत सांठिल्ल्या उदकाक लागून गांवांनी हुंवार येवचो ना, हाचीय जतनाय घेवची पडटली. कारण पयल्या वर्सा हुंवार आयिल्लो, तेन्ना सत्तरींत इतलें उदक वाडपाक, तुंबून उरपाक बांदूच जापसालदार असो जाहीर दावो कांय हुंवारपिडेस्तांनी केल्लो. तेन्ना हे नवे 100 बांद उबारतना आशीकुशीच्या गांवांक पावसाच्या दिसांनी (जून ते आॅक्टोबर!!) तांची बादा जावची ना, हें मतींत घेवचें पडटलें.
आमच्या फुडाऱ्यांक, अधिकाऱ्यांक अभ्यास भोंवडी कम पिकनीक काडपाची खूब हौस. तांणी उदकाची जपणूक आनी संवर्धन मळाचेर महाराष्ट्र, कर्नाटकान कितें वावर केला, ताचो अभ्यास करपाक जाय. हाचे पयलीं तो जालाच. आतां नव्यान जावचो. तशी इंटरनेटाचेरूय हे विशीं जाय तितली म्हायती मेळटली. तिही पुराय संवसारांतली!! ह्यो उदक सांठोवपाच्यो पद्दती वापरांत हाडपाक जाय. दोंगरांचेर दाट झाडां आसत जाल्यार तीं उदक सांठोवन दवरतात. गोंयांत असले पाचवेचार दोंगर आतां सोंपत आयल्यात. 2050 साला उपरांतचे पिळगेक ते युट्यूबाचेर पळोवपाक मेळटले. दोंगरांचेर फोंड खणून, चर मारून उदक आडायतात, जिरयतात. कांय कडेन रस्त्या कुशीक सोकपीटा सारके फोंड मारून तातूंत उदक सांठयतात. गोंयांत तें धोक्याचें, कारण हांगा येरादारी चड. दोंगराचेर बांयो मारतात. ताचें उदक गिमाच्या दिसांनी सकयल्या शेतांनी झिरपता. पावसाचें उदक सांठोवन तें वापरपी गोंयकार आसात. निदान प्रत्येक नवे इमारतींत ही येवजण चालीक लागची. पावसाचें लाखांनी गॅलन उदक व्हांवन दर्याभेटेक वता. तें जमनींत जिरोवप शक्य ना?
मुळांत गोंयांत पिवपाचें शुद्ध उदक उणें. आसात त्यो न्हंयो, व्हाळ, खारजां प्रदुशित जायत आसात. कांय जाणांक तर गटाराचें स्वरुप आयलां. मेळत तो न्हंयांनी सिवरेज, घाणयारें उदक, रसायनां, कोयर, प्लास्टीक रकयत आसता. आमच्या न्हंयांनी प्रदुशण जावचें ना, हाची जापसालदारकी प्रत्येक पंचायत, पालिकेन घेतली जाल्यार पिवपाच्या उदकाची टंचाय जावची ना. उदक माफिया तयार जाल्यात, तांचेरुय नदर जाय. जमल्यार दर्याचें उदक शुद्ध करचें. गोंयांत अंदूं पावस उसरां सुरू जालो. फुडाराक श्रावण लागलो तरी पावसाक नेट ना, अशेंय जावंक शकता. कारण हालींच्या वर्सांनी हवामान खूब लहरी जालां. तें कितें खेळ करीत हें सांगप कठीण. तसो प्रसंग आयल्यार आमचे कडेन फावो तितलें उदक जाय. न्हंयो खोलावप, भितरलो चिखल उसपप, उदक सांबाळून वापरप हेंय सगल्यांनी मनार घेवंक फावो. केंद्र सरकाराची न्हंयो जोडपाची येवजण खंय मेरेन पावल्या? शास्त्रोक्त तरेन हें जायत जाल्यार सगल्यांत उदक मेळटलेंच, तशेंच हुंवारूय येवचे नात.
गोंय सरकारान 100 बांद बांदतना परंपरीक आनी आधुनीक पद्दतीन चडांत चड उदक जमनींत जिरोवपाक मेळटलें, हे खातीरूय पावलां उखलचीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
