भांगरभूंय | प्रतिनिधी
सावळो धर्मा नायक हांचो जल्म 10 मे 1958 दिसा जालो. करंजाळ- मडकय हो तांचो जल्मगांव. नुस्तें मारप हो गावच्या लोकांचो वेवसाय आशिल्ल्यान सावळो बापायच्या सांगाताक नुस्ते मारपाक वताले. घरची परिस्थीती बेतांचीच आशिल्ल्यान तांका ह्या धंद्या कडेन वळचे पडलें.
तांका शिक्षणाची खूब आवड. पूण आपूण शिकपाक गेलो जाल्यार धाकट्या भावंडांचें शिक्षण बंद जातलें म्हूण तांणी आनी तांच्या व्हडल्या भावान धावी मेरेन शिक्षण घेतलें आनी दोन वर्सांचो आयटीआय इलेक्ट्रिकल कोर्स केलो.
तांणी सुरवातीक सीबा कंपनी, खोर्ले हांगां काम केलें. ताचे उपरांत झुवारी कंपनीचो कंत्राटदार न. क. नायक हांचे लागीं काम केलें. थंयच काम करतनाच तांकां गोंय शिपयार्ड हे बोट बांदणी कंपनींत काम मेळ्ळे. त्या आस्थापनांत तांणी एकंदरीत 34 वर्सांचे आपले कारकिर्दीन तांणी ऑपरेटर, सुपरवायझर, ग्रेड 1 ते ग्रेड 5 ते ज्युनियर इंजिनियर मेरेन वेगवेगळ्या पदांचेर काम करून सध्याक सेवानिवृत्ती उपरांत पुराय वेळ फाटलीं साबार वर्सां नाट्यकलेन ओंपल्या.
वयाच्या 15 वर्सांचेर मडकयंतल्या पारांपय वाड्या वयल्या दत्त देवळाच्या आंगणांत दत्तजयंती निमीत्त जाल्या “देव नाही देव्हाऱ्यात” ह्या नाटकांतल्यान नाट्य मळाचेर पावल दवरलें. उपरांत कांय आडवाद सोडले जाल्यार दरवर्सां शिगमो, होळयेच्या निमतान जातल्या नाटकांनी मडकय गांवच्या करंजाळ बालनाट्य मंडळाच्या वतीन वेगवेगळ्या सामाजिक, इतिहासीक, पौराणिक तशेंच काल्पनीक नाटकांनी वेगवेगळ्यो मुखेल भुमिका सादर केल्यो.
फाटलीं पांच दशकां गोंयच्या हौशी रंगभूंयेची सेवा तांचे कडल्यान घडत आसा. मडकय बरोबरुच तांणी काणकोण, वास्को, धारबांदोडें अशा वेगवेगळ्या वाठारांनी हौशी रंगभुंयेर काम केलें. अशें हें काम करीत आसतनाच ‘गोंय- एक जैत कथा’ हे महानाट्य कला आणि संस्कृती मंत्री भौमानेस्त गोविंद गावडे हांचे संकल्पनेतल्यान राजीव गांधी कला मंदिर निर्मीत महानाट्यान वेगवेगळ्यो भुमिका सादर करपाचो मान तांका फावो जालो.
आयज मेरेन तांणी खूबशा नाटकांनी भुमिका सादर केल्यो. जशें आकाश पेलताना (बॅरिस्टर बाप्पाजी), तळहाताच्या नाजुक रेषा (विजय) वेडा वृंदावन (वृंदावन), वाहतो ही दुर्वांची जुडी (सुभाष), बाबा वेगळं व्हायचंय मला (कक्कड), निष्पाप (मेजर विश्वनाथ), धाडीला राम तिने का वनी (राजा दशरथ), नातीगोती (काटदरे), गरूडझेप (मोरोपंत), रक्तरंगण (अनाजी दत्तो), एक फुल दसणीचें (शेजारी), इथे ओशाळला मृत्यू (औरंगजेब). गोविंद शिरोडकार, रघुवीर नायक, पांडुरंग शिरोडकार, लक्ष्मण नायक, जुझे गोयस, शशिकांत नागेशकार, निलेश महाले अशा दिग्ददर्शकांचें तांकां मोलादिक मार्गदर्शन फावो जालें. तातुंतल्यान नाटकाचे कायिक- वाचिक अभिनय, संवाद फेक, चढ उतार, नेपथ्य आनी नाटकांतलीं हेर तंत्रां तांणी व्हडल्या दिग्दर्शका कडल्यान शिकून घेतलीं. ह्या अणभवाचेर तांणी दिग्दर्शन, नेपथ्य केलें.
गोंयच्या जायत्या जेश्ठ कलाकारां बरोबर काम करपाची संद तांकां मेळत आसा. आपली नोकरी इलेक्ट्रिकल क्षेत्रांतली आसूनुय तांणी रंगदेवतेची सेवा करपाचो, अभिनयाचो स्पार्क कायम सांबाळून दवरला. हौशी रंगभूमी गोंयात फुल्ल्या, फळ्ळ्या ती सावळो उर्फ अरूण नायक शिरोडकार हांचे सारक्या पयशांची अभिलाषा न बाळगुपी कलाकारां लागून. तांच्या फुडल्या नाट्य प्रवासाक आमच्यो शुभेत्सा.
निशाकांत राजाराम नायक
वडाळवाडा, मडकय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
