भांगरभूंय | प्रतिनिधी
पणजीः भारत सरकार, नवी दिल्लीच्या गृह खात्या खाला राजभास विभागान 2025-26 वर्सा सावन ‘राजभास गौरव पुरस्कार येवजण’ नांवाची सुदारीत येवजण सुरू केल्या, जाचो हेत मूळ हिंदी भाशेंत पुस्तकां बरोवपाक प्रोत्साहन दिवप आनी हिंदी राजभाशेचो प्रचार करप आसा.
हे येवजणे खाला अभियांत्रिकी, इलेक्ट्रॉनिक्स, संगणकीय विज्ञान, कायदो आनी पुलीस संशोधन, न्यायवैद्यक विज्ञान, संस्कृती, धर्म, कला आनी दायज आनी हेर संबंदीत विशयांचेर हिंदींत मूळ पुस्तक बरोवपी भारताच्या नागरिकांक पांच श्रेणींनी पुरस्कार दितले. तशेंच अभिजात साहित्य आनी संस्कृती, कला, दायज आदी संबंदीत विशयांचेर हिंदींत अनुवाद केल्ल्या पुस्तकां खातीर पुरस्कार भेटयतले. तेच वांगडा ‘सी’ प्रदेशांतल्या बिगर हिंदी लेखकांक लेगीत पुरस्कार दिवपाची हे येवजणेंत तरतूद आसा.
दर श्रेणींत 1.5 लाख रूपया ते 40 हजार रूपया मेरेनचे तीन पुरस्कार दितले. जानेवारी ते डिसेंबर 2026 ह्या काळांत उजवाडाक आयिल्ल्या पुस्तकांचो ह्या पुरस्कारा खातीर विचार करतले.
तेच तरेन सरकारान मंत्रालयां, विभाग, पी एस यू, मंडळां/स्वायत्त संस्था, ट्रस्टां, राष्ट्रीयकृत बँको, विभागीय हिंदी मासिकां आदी खातीर ‘राजभास कीर्ती पुरस्कार’ नांवाची पुरस्कार येवजण सुरू केल्या. राजभास धोरणाचे अंमलबजावणी संबंदी त्रैमासीक प्रगती अहवालाचेर आदारून ढालीच्या रूपांत तीन पुरस्कार दितले. अर्ज करपी संस्थांनी पुरस्कारा खातीर पात्र जावपा खातीर हेर निकश पुराय करूंक जाय.
पुस्तकांची मोलावणी सरकारान नेमिल्ले तज्ञ समिती वरवीं जातली. अर्जदारान पुस्तकाच्यो तीन प्रती जोडिल्ल्या प्रोफॉर्मा वांगडा धाडच्यो. दोनूय येवजण्यांच्या अटी आनी शर्तीं विशीं चड म्हायती https://rajbhasha.gov.in/en वा https://rajbhasha.gov.in ह्या खात्याचे वॅबसायटीचेर उपलब्ध आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
