भांगरभूंय | प्रतिनिधी
मडगांवः केपेंच्या कावरें- पिर्ला वाठारांत श्वेत गावडे हो पिस्तूल हाताळटना तन्वी घाडी (20) हाका गुळी लागून मरण आयिल्लें. ह्या प्रकरणांत वापरिल्लें बेकायदेशीर शस्त्र दवरपाच्या आरोपा खाला दुबावीत श्याम गांवकार हाचो अटकपूर्व जामीन अर्ज मडगांवच्या अतिरिक्त सत्र न्यायालयान न्हयकारलो.
अतिरिक्त सत्र न्यायाधीश राम एस. प्रभुदेसाय हांच्या न्यायालयांत ह्या अर्जाची सुनावणी जाली. ही घडणूक 12 एप्रिलाक कावरे- पिर्ला घडिल्ली. दिवचलचो श्वेत गावडे (23) हो दुबावीत श्याम गांवकार हांचे पिस्तूल हाताळटा आसतना अचकीत गुळी सुटली. ती गुळी तन्वी घाडी हिच्या मानेक लागली आनी थंयच तिका मरण आयलें.
सुनावणी वेळार शाम गांवकार घडणुकेच्या वेळार थंय नाशिल्लो असो दावो ताच्या वकिलांन केलो. पूण परवानो नासतना शस्त्र दवरप आनी ताचो गंभीर गुन्यांवांत वापर करप हें न्यायालयान खूब गंभीर मानले. ह्या प्रकरणाची पुलिसांची चवकशी अजून प्राथमीक पांवड्यार आसा आनी दुबाविताक जामीन मेळ्ळो जाल्यार पुराव्यां कडेन घुस्पागोंदळ जावंक शकता वा चवकशेक आडमेळीं येवंक शकतात अशें न्यायालयान म्हणलें. बेकायदेशीर शस्त्र खंयच्यान आयले आनी तें मुखेल दुबावीत श्वेत हाच्या हातांत कशें आयलें तें सोदून काडपा खातीर श्याम गांवकार हाची कोठयेत चवकशी करप गरजेचें अशें न्यायालयान निरिक्षण नोंद करून ताचो जामीन अर्ज न्हयकारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
