भांगरभूंय | प्रतिनिधी
हॅलॅनीक रिपब्लीक हें ग्रीसाचें अधिकृत नांव. ग्रीस हो दक्षीणपूर्व युरोपांतलो एक देश. ग्रीसाचे उत्तर पश्चिमे वटेन अल्बेनिया, उत्तरेक नॉर्थ मॅसिडोनिया आनी बल्गेरिया आनी उत्तर पूर्व वटेन तुर्की हे देश आसात. युरोप, आशिया आनी आफ्रिका ह्या खंडांक तेंकून हो देश आसा. दर्यावेळो, दोंगर, रानजीव हे ह्या देशाची सोबीतकाय वाडयता. ग्रीसांतलो खंयचोय भू वाठार दर्या पासून 140 किलो मिटराच्या अंतराचेर आसा. ग्रीसांतली दर्यादेग सुमार 16,000 किलो मिटरांची आसा. ऍथॅन्स हें ग्रीसाचें राजधानी शार.
जुंवे – ग्रीस हो देश वेगवेगळ्या ल्हान-व्हड जुंव्यांक मेळून तयार जाल्लो देश. 2000 ते 6000 मेरेन ल्हान आनी व्हड जुंवे ह्या देशांत आसात. पूण तातूंतल्या सुमार 170 ते 200 जुव्यांचेरूच लोकवस्ती आसा. अजियन दर्यांतले सिकलडीज आनी डोडॅकनीज जुंवे फातराळ आसात जाल्यार जाकिंथॉस सारकिले आयोनियन जुंवे सुपीक आसात. क्रीट हो ग्रीसांतलो सगळ्यांत फामाद जुंवो. सांटरिनी, कॉफू, स्पॅट्सीस, मिकनोस सारकिल्या हेर जुंव्यांचेर पर्यटक मोटे संख्येन भेट दितात. एका जुंव्या वेल्यान दुसर्या जुंव्याचेर वचपाक फेरीबोट वा मोट्या बोटींचो वापर करतात.
म्हत्वाचीं थळां – ग्रीसांत जुंव्या सयत इतिहासीक सुवातो तितल्योच लोकप्रिय आसात. प्राचीन काळांतल्या शिल्पांचे अवशेश ग्रीसांत पळोवपाक मेळटात. ऍथॅन्स हें शार इतिहासीक नदरेन खूब म्हत्वाचें. ऍथॅन्साच्या दोंगरार ‘अक्रोपॉलीस’ ही पांचव्या शेंकड्यांतली ग्रीक धर्मीक वास्तू आसा. तशेंच ऑलम्पियन ज्यूसाची वास्तू, वस्तूसंग्रहालयां, इगर्जो पळोवंक हजारांनी पर्यटक ह्या शाराक भेट दितात. ऍथॅन्सा सयत सलॉनीक, पायरीयस, पट्रॅस, कॉरींथ हीं ग्रीसांतलीं हेर मुखेल शारां. ग्रीसांत सुमार 18 संवसारीक दायज सुवातो आसात.
शेती – ग्रीसांतलो फकत एक चतुर्थांश भाग शेती खातीर वापरतात. हेर वाठार दोंगर, रान आनी उदकांत आसपाविल्लो आसा. थेसाली ह्या मैदानी प्रदेशांत ग्रीसांतल्या हेर भागा परस चड प्रमाणांत शेत कसतात. तशेंच मॅकेडोनिया आनी थ्राकी ह्या वाठारांनी पीक रोयतात. कापूस, पिस्ता, तांदूळ, ऑलीव, अंजीर, बदाम, टमाट, काळगां हाचें उत्पादन ग्रीसांत जाता.
ऑलिम्पीक खेळ – 1896 वर्सा ग्रीसांतल्या ऍथॅन्स शारांत पयलो ऑलिम्पीक खेळ जाल्लो. 12 देशांतल्या 280 खेळगड्यांनी ह्या खेळांतल्या 43 वेगवेगळ्या सर्तींनी वांटो घेतिल्लो. पनॅथनेक स्टेडियमाचेर चडश्यो सर्ती जाल्ल्यो. ताचे उपरांत 2004 वर्सा ऍथॅन्स शारांत परत ऑलिम्पीक खेळा सर्त जाली.
भाशा – ग्रीक ही इंडो-युरोपी भाशा कुटुंबांतली म्हत्वाची भास. ग्रीक भाशा 3,000 परस चड वर्सां पयलींची भास अशें संशोधकांनी सिद्द केला. आयोनियन, ऍटीक, एओलियन, डोरीक ह्यो ग्रीक भाशेच्यो कांय म्हत्वाच्यो बोली. ग्रीक भाशा बरोवंक ग्रीक अल्फाबॅटाचो वापर करतात.
खाणां-जेवणां – भाजयो खास करून वांयगीं, फळां, ऑलीव, ऑलीव ऑयल (तेल), चीज, ब्रॅड, नुस्तें, मांस ह्या जिनसांचो वापर ग्रीक खाणांनी जाता. ‘मुसाका’, ‘पापूटसाकी’ (वांयग्याचो पदार्थ), ‘पास्टीट्ज्यो’ (ग्रीक लजानिया), ‘सुवलाकी’ हे पारंपारीक ग्रीक पदार्थ अशें मानतात. ऑरिगॅनो, थायम, बेसील, पार्स्ले, लसूण हांचो वापर ग्रीक खाणांनी मोट्या प्रमाणांत जाता. ग्रीक खाणांचेर तुर्की राजवटीचो परिणाम दिसता. बकलावा हो गोड पदार्थ ग्रीसांत लोकप्रिय आसा. ओटोमन राजवटीचो प्रभाव उत्तर ग्रीसांतल्या खाणांचेर दिसता.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
