भांगरभूंय | प्रतिनिधी
बल्गेरिया आनी ग्रीस हे दोनूय युरोपी देश एकामेकांक तेंकून आसात. बल्गेरिया आनी ग्रीस ह्या दोनूय देशांचेर वेगवेगळ्या साम्राज्यांनी राज्य केलें. चार शेंकड्यां परस चड काळा खातीर तुर्कांनी ह्या देशांचेर सत्ता चलयली. बल्गेरियाक 1908 वर्सा स्वतंत्रताय मेळ्ळी. दक्षीण ग्रीसाक 1832 वर्सा आनी उत्तर ग्रीसाक 1913 वर्सा स्वतंत्रताय मेळ्ळी. अर्थवेवस्थेचे नदरेन हे देश संघर्श करतात. भुगोलीक नदरेन हे देश सामके वेगळे आसात. ह्या देशांची येणावळ पर्यटन मळाचेर निंबून आसा. बल्गेरियांतली ब्लॅक सी दर्यावेळ पळोवंक पर्यटक भेट दितात. जाल्यार ग्रीसांतलीं इतिहासीक थळां आनी ग्रीक जुंवे पर्यटकां मदीं फामाद आसात.
बल्गेरियांतली शेती – बल्गेरियांतली सुमार 41 टक्के जमीन शेती खातीर वापरतात. सामुहीक आनी सरकारी शेत जमीन ह्या देशांत आसात. ह्या शेत जमनींचे आतां कृशी उद्देगीक प्रकल्पांत रुपांतर जाता. गंव, मको, बीट, बार्ली, तांदूळ, सूर्यफूल, कापूस, तंबाखू, बटाट, टमाट, द्राक्षां, साकर अशी पिकावळ बल्गेरियांत जाता. अत्तरा खातीरचें गुलाबाचें तेल तयार करून ताची निर्यात करपी हो मुखेल देश. डॅन्यूब आनी मरित्स ह्या दोन न्हंयांच्या आदारान ही पिकावळ जाता. हाचे सयत इस्कर, आर्डा, टुंजा ह्यो हेर म्हत्वाच्यो न्हंयो बल्गेरियांतल्या शेती वेवसायाक आदार दिता.
कुकेरोव डॅन महोत्सव – कोरेझम सुरू जावचे आदीं पयल्या आयताराक कुकेरोव डॅन हो महोत्सव बल्गेरियांत मनयतात. ह्या महोत्सवांतल्यान शेती वर्साक सुरवात जाता. बल्गेरियांतल्या वेगवेगळ्या शारांनी आनी गांवांनी लोक मिरवणुको काडून नाचतात. कुकेरी हो पारंपारीक भेस आनी तोंडार मास्क घालून लोक मिरणुकेंत भाग घेतात. बरी पिकावळ जावची म्हणून परंपरेन ही मिरवणूक बल्गेरियांतले लोक काडटात.
म्हत्वांचीं थळां – सोफिया ही बल्गेरियांतली राजधानी. शिक्षण आनी उद्देगाचें हें केंद्रस्थान. बल्गेरियन अकॅडॅमी ऑफ सायिन्सीस, अकॅडॅमी ऑफ एग्रीकल्चरल सायिन्सीस आनी युनिवर्सिटी ऑफ सोफिया ह्यो ह्या शारांतल्यो सगळ्यांत आदल्यो शिक्षणीक संस्था. ह्या शारांतली ट्रॅम सेवा येरादारी खातीर खूब उपेगी थरल्या. प्लॉवदिव हें वेपाराचे नदरेन म्हत्वाचें शार. तशेंच सांस्कृतीक केंद्र म्हणून हें शार मुखार सरता. ह्या शारांत वर्सुकी आंतरराष्ट्रीय वेपार महोत्सव जाता. बुर्गास ह्या शारांत ब्लॅक सी दर्यादेगेर बंदर आसा. वेपारा खातीर हें बंदर म्हत्वाचें थारलां. प्लेवेन, स्लीवेन, गाब्रॉवॉ, पेर्नीक हीं हेर कांय म्हत्वाचीं शारां बल्गेरियांत आसात.
पर्यटन – थ्रिशन, ग्रीक, रोमन्स, स्लाव्स, बल्गर्स, ओटमन्स अश्या साबार संस्कतायेंचो परिणाम बल्गेरिया देशाचेर दिसता. पोरण्यो इगर्जो, मॉनॅस्ट्री, मशिदी ह्या देशांत आसात. रिला मॉनॅस्ट्री ही संवसारीक दायज सुवात दक्षीण बल्गेरियांत आसा. कोप्रिवश्टिट्जा ह्या शारांत पोरणी संस्कृताय, वस्तुसंग्रहालयां तशेंच आदल्या काळावेलीं घरां पळोवंक मेळटात. झॅरव्ना ह्या गांवांतलीं लाकडी घरां पळोवंक आनी अणभवूंक कितलेशेच पर्यटक ह्या गांवाक भेट दितात. सुजोपोल हो दर्यादेगेर वशिल्लो गांव. मे ते सप्टेंबर ह्या काळांत पर्यटक ह्या गांवाक भेट दितात. वेलिको टार्नोवो हें बल्गेरियांतलें पोरणें शार पर्यटकां मदीं बरेंच लोकप्रिय आसा.
खाणां-जेवणां – बीफ, पोर्क, भाजयो, मसाले हे बल्गेरियांतल्या खाणांत प्रामुख्यान मेळटात. ‘मेशाना स्कारा’ हो पोर्क, मांसा पसून तयार केल्लो पदार्थ. ‘कबाब्क’ हे पोर्का पसून तयार केल्ले कबाब. सॉसेज आकाराचे हे कबाब्क आसतात. ‘कवार्मा’ हो जिनस मातयेच्या आयदनांत तयार करतात. भाजी आनी मांस हांचें मिश्रण करून कवार्मा तयार करतात. ‘टॅराटर’ हो पारंपारीक सूप गिमाळ्यांत पितात. सार्मा, काफ्ट, लुकँका, बॅनिट्जा अशीं हेर कांय पारंपारीक खाणां बल्गेरियांत खावपाक मेळटात.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
