ना खाऊंगा, ना खाने दुंगा…

भांगरभूंय | प्रतिनिधी

भ्रश्टाचार करपी जितलो गुन्यांवकारी तितलोच भ्रश्टाचाराक उर्बा दिवपीय गुन्यांवकार जाता. भ्रश्टाचार मुळा पासून हुमटावन भायर उडोवपाच्यो घोशणा जाल्यो, संवसारीक भ्रश्टाचार विरोधी दीस जाले तरी भ्रश्टाचाराचें बीं संवसारभार पातळल्लां.

झिरो टॉलरन्स टू करप्शन, हीं उतरां आदले मुखेलमंत्री मनोहर पर्रीकार हांचीं, 2012 वर्सा भाजपा सरकार गोंयांत सत्तेर आयिल्लें तेन्नाचीं. 2014 वर्सा केंद्रांत प्रधानमंत्री नरेंद्र मोदी सरकाराचो सोपूतविधी जाले उपरांत तांणीय ‘ना खाऊंगा, ना खाने दुंगा..’ अशें सांगिल्लें. देशाचे संरक्षणमंत्री जाले तेन्ना पर्रीकार हांणीय संरक्षण मंत्रालयांतलो भ्रश्टाचार कमी करपाचें आश्वासन दिल्लें. दोगांचींय उतरां मोलादीक, भ्रश्टाचार उणो करपाक दोगांकय थोडें जैतय मेळ्ळां, पूण भ्रश्टाचाराचो खवदळ अजुनूय पुराय थांबूंक ना हें राज्य, केंद्र सरकारय मान्य करता.
भ्रश्टाचार 100 टक्के थांबिल्लो जाल्यार भ्रश्टाचारा आड दीस कित्याक पाळटले आशिल्ले? गोंयांत तर मंत्रीच भ्रश्टाचार दाखोवन दितात, एकामेकांच्या आंगाचेर भ्रश्टाचाराच्या चिखलाचो शिंवर करतात. अर्थ एकूच, भ्रश्टाचाराचें मूळ, कीड अजुनूय आसा, प्रशासनांतलीं आडमेळींय पयस जावंक ना, उदरगतय कळावान जाता.
9 डिसेंबर हो आंतरराष्ट्रीय भ्रश्टाचार विरोधी दीस म्हणून पाळटना गुजरात राज्यांतले वेंचणुकेचो निकाल आयिल्ले आसतले. वेंचणुकेंत जैत न मेळिल्लेच न्हय जाल्यार जैतीवंतय वेंचणूक भ्रश्टाचाराचेर बडी मारत रावतले, फुडले वेंचणुके मेरेन गुजरातांतलो भ्रश्टाचार शुन्याचेर हाडपाचें उतर सत्तेंत येवपी दितले. उतराक पाळो दिवपीय आसात पूण तांकां तरी भ्रश्टाचार शुन्याचेर हाडप शक्य जायत?
भ्रश्टाचाराची ताळी एका हातान वाजना, ती दोनय हातांनी वाजोवची पडटा. भ्रश्टाचार म्हणल्यार लांच दिवप, लांच घेवप, चिरीमिरी दिवप, घेवप अशें कोश सांगता. चिरीमिरी, लांच घेवप, दिवप म्हणल्यारच भ्रश्टाचार हो अर्थय कांय तेंपान बदलपाची शक्यताय आसा. भ्रश्टाचाराचीं नवीं रुपां, रंग फायलींनीय आसतात, बडयो मारल्यो, आरोप केले म्हणून भ्रश्टाचार जालाच अशें म्हणप समा जायत? भ्रश्टाचारांत घुस्पल्ल्याचें नांव घेवचे आदीं ते विशींचे पुरावे आसप, सांबाळप गरजेचें. पुराव्यां बगर भ्रश्टाचाराचें मूळ सोदप, तें चिड्डून उडोवप कठिणूच. तातूंतल्यान ‘ना खाऊंगा, ना खाने दुंगा…’ ह्या उतरांचो अर्थय आयज वेगळोच लावपाक लागला, जेवणावळी, रेवडी संस्कृताये मेरेन तो पावला. वेंचणुकेंतल्या जेवणावळीची, रेवड्यांची संस्कृताय स्कुटरी, गाडयो, फ्लॅटां मेरेन पावता ती फाल्यां विमान, हॅलिकॉप्टरा मेरेन पावचीच ना अशें एक तरी राजकारणी सांगत? वेंचणुकेच्या उपरांत वा पयलीं कित्याक, सरकार सत्तेर येत सावन सरकाराचो पराजय जाय मेरेनय दिवपा घेवपाची संस्कृताय हालीं येवपाक लागल्या. संवसारांतल्या एकवटीत राष्ट्रांचे परिशदेंत 2003 वर्सा आंतरराष्ट्रीय पांवड्यार भ्रश्टाचारा आड दीस पाळपाचो निश्चेव जालो. वीस वर्सांत अती भ्रश्टाचार खंयच्या राष्ट्रांत आसा, खंयचीं राष्ट्रां भ्रश्टाचार आड खर पावलां उबारतात तांची वळेरीय तयार जाता. वळेरेंत भ्रश्टाचार नासतलो? ती सत? हाची गवाय कोणें दिवप? संवसारांतल्या राष्ट्रांच्या हजार मुखेल्यांनी?
भ्रश्टाचाराच्यो किडी आमचे लोकशायेचे खांबे जेन्ना पोखरतात तेन्ना ती एकाच खांब्यार थांबना, समाजाच्या चारय आंगांनी भोंवता, समाजच पोखरता. पोखरिल्ल्या समाजांतल्यान लोकलढ्याची भास जेन्ना जाता तेन्ना तांकां लांच दिवन विकते घेवपाची यंत्रणाय जल्माक येता. त्या यंत्रणां मुखार ‘ना खाऊंगा, ना खाने दुंगा…’ सारक्यो घोशणा कितल्योय जाल्यो तरी त्यो पोक्योच समजुपी हजारांनी आसतात, पूण तेय अचकीत ना जातात, भ्रश्टाचाराची कीड थंयच उरता. सुप्रिम कोर्ट जेन्ना रेवडी संस्कृताये विशीं सरकाराक प्रस्न विचारता तेन्ना त्यो गोंयचे जात्रेंतल्यो रेवड्यो न्हय जाल्यार देशांतल्या वेंचणूक भ्रश्टाचाराचीं मुळां सोदता हें सरकाराक खबर आसा. जात्रेंतली रेवडी तातूंतले तिळां वरी ल्हान आसत, पूण पंचायत ते लोकसभा वेंचणुकूच कित्याक सरकारी कागदपत्रां, प्रमाणपत्रा, बढत्यो, बदल्यो, नोकऱ्यो, कंत्राटा म्हणल्यारच आपल्याक जाय तें मेळोवपा खातीर दिल्ली लांच केन्ना केन्ना हिसपा भायर आंग पातळायता.
सरकारांतच न्हय जाल्यार खासगी क्षेत्रांत भ्रश्टाचार वाडत आसा. तेच खातीर केन्ना केन्ना राजकारणीय भ्रश्टाचार संवसारीक गजाल (फिनोमेना) अशे सांगतात. संवसारांतल्या, भारतांतल्या भ्रश्टाचाराच्यो काणयो एक दोन न्हय जाल्यार लाखांनी आसतल्यो. देखी दिवचे आदीं एकादऱ्या भ्रश्टाचाराच्या प्रकरणाची चवकशी खंय मेरेन पावल्या ताचो अभ्यास करचो पडटा. भ्रश्टाचारा विशीं एकादऱ्याक गुन्यांवकारी थारावप, पुलिसांत एफ.आय.आर. करप, गुन्यांवकाराक बंदखणेंत घालप, ताका सोडोवप आनी उपरांत एकाद्रे लोकपाला मेरेन प्रकरण धाडप ह्यो घडणुको जाता म्हणसर वर्सांचीं वर्सां वतात. पयलींच गुन्यांवकार थारायल्लो निमाणे निर्दोशय थारता, ते पासत सरकार, भौसांनीच न्हय जाल्यार गुन्यांवकाराक दोशी थरोवपी यंत्रणांकय सादूर रावचें पडटा. भ्रश्टाचारांत गुन्यांवकार थरयल्ले बंदखणेंतय घरचे वरी रावतात, दिसान दीस हॉस्पिटलाच्यो खाटी आडायतात, वेंचणूक बंदखणेंतल्यान जिखतात.
भ्रश्टाचार करपी जितलो गुन्यांवकारी तितलोच भ्रश्टाचाराक उर्बा दिवपीय गुन्यांवकार जाता. भ्रश्टाचार मुळा पासून हुमटावन भायर उडोवपाच्यो घोशणा जाल्यो, संवसारीक भ्रश्टाचार विरोधी दीस जाले तरी भ्रश्टाचाराचें बीं संवसारभार पातळल्लां. एकाद्रे एकवटीत राष्ट्र संघटनांच्या बसकांनी हाचे फुडें ताचेर विचारमंथनय जायत. संघटनेच्या बसकांनी भ्रश्टाचाराचे दुबावीत आसचे ना हाची जापसालदारकी संघटनेक घेवची पडटली पूण तरी कंत्राटी भ्रश्टाचार जाल्यार? कांय राष्ट्रांनी म्हाभियोगाची यंत्रणा आसा, म्हाभियोगाच्यो बसकाय वर्सांचीं वर्सां जातात, एके बसकेन भ्रश्टाचाराचें कुवाडें सुटना.
भ्रश्टाचाराचे आरोप करपी पर्रीकार, हांकांय भ्रश्टाचारांत घुस्पुवपाचे येत्न जाले, ताचे आड ते झुजले. खणी, क्रिकेट मॅची, जायका, राफायल, बँको, सारें, खावड तशेंच आनी हेर व्हडा भ्रश्टाचाराच्या प्रकरणांचो अभ्यास केल्यार निमाणे कडेन दोंगर पोखरून हुंदीर भायर सरिल्ले वरी दिसतलें. आमच्या देशांतले व्हड वेपारी, उद्येगपती देसांत दोशी थरयल्यार रातयां दुसऱ्या देशांनी वचून मेकळेपणान भोंवतात तांच्यो देखी दोळ्यां मुखार दवरून कायद्यांत बदलय जातले पूण मूळ भ्रश्टाचाराच्या बिंयाचें कितें?
‘ना खाऊंगा, ना खाने दुंगा…’ हे घोशणे कडेन पळोवपाची नदर बदलता, ताचो संबंद सदचे खाणा जेवणा कडेन लावपीय समाजांत आसात तातूंत साधू संतांचो आसपाव आसचोना?
भौशीक वावरांत जावपी भ्रश्टाचार पळोवन, सरकारी नोकरे खातीर पयशे मागतात ते आयकून जांकां भुरगेपणा सावन स्वयंसिद्ध जावपाक शिकयल्यात तातूंतले बुदवंत फुडें वतले, तिगतले पूण हेरांचें कितें? पयसो दिवन नोकऱ्यो मेळोवपीय उपरांत लांच घेतात, मेळत थंय आडायतात. परिक्षेचे पेपर विकपाच्यो घडणुको घडटात तेन्ना त्यो थांबोवपा पासत येत्न करचेच पडटले. शिक्षणाचें मळ भ्रश्टाचारा पासून पयस दवरपाच्या व्हडा झुजाची तयारी करतनाय राजकारण, राजकारण्यांक कुशीक दवरपाची गरज आसा. भ्रश्टाचार भौशीक जिणेंत पावता तेन्ना उदरगतच न्हय जाल्यार मनीसपणय जिवितांतल्यान शेणटा, जिवीत, हाशें नकली जाता तेन्ना कितें करप? वाट कोण दाखयतलो?

सुहासिनी प्रभुगावकर
9881099260