भांगरभूंय | प्रतिनिधी
व्हड प्रमाणांत उदक गेलें फुकट
बोरी: बोरी पंचायत वाठारांत उदका पुरवण करपी मुखेल उदका पायपलायन फुटपाचे प्रकार वाडत आसात. बुधवारा फांतोडेर 3 वरांचेर पाणीवाडो बोरी हांगा 750 एमएम उदका पायपलायन फुटिल्ल्यान व्हड प्रमाणांत उदक फुकट गेलें. उदकाचो प्रवाह इतलो खर आशिल्लो की वाठार उदकान भरलो.
फोंडेंच्या उदका पुरवण विभागाच्या कर्मचाऱ्यांनी ताकतिकेन फुटिल्ली उदका पायपलायन बंद करून दुरुस्तीचें काम हातांत घेतलें. रातीं उसरां मेरेन झुजा पांवड्यार काम सुरू आशिल्लें.
उदका विभागाचे कार्यकारी अभियंतो निवृत्ती पार्सेकार, साहाय्यक अभियंतो यशवंत मापारी, कनिश्ठ अभियंतो काशिनाथ सराफ, मुखेल उदका वाहिनीचे पर्यवेक्षक दीपक गावडे, बोरी विभागाचे पर्यवेक्षक रुपेश नायक भामयकार आनी कर्मचारी वर्ग हाजीर आशिल्ले.
लोकांक वेवस्थीत उदक मेळचें म्हूण थळावे आमदार सुभाष शिरोडकार आनी बोरी पंचायत मंडळाचे सहकार्य मेळत आसा.
बोरी पंचायत वाठारांत पोरण्यो उदका पायपलायनी सेगीत फुटत आशिल्ल्यान लोकांचे हाल जातात. पोरण्यो उदका पायपलायनी बदलपाची मागणी थळाव्या लोकां कडल्यान जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
