भांगरभूंय | प्रतिनिधी
वीज वाहिन्यांचे कंडक्टर्स बसोवपाच्या कामाचो शुभारंभ
वास्को: पर्यटन थळा खातीर गोंयाक पसंती आशिल्ल्यान हवाई प्रवाशांची संख्या दिसानदीस वाडपाची आशिल्ल्यान दोन विमानतळांची गरज आसा. हवाई प्रवाशांची वाडटी संख्या लक्षांत घेवन फुडल्या 20 वर्सांत घडये तिसऱ्या विमानतळाची गरज भासपाची शक्यताय न्हयकारूं येनाशिल्ल्याचें पंचायत मंत्री मॉवीन गुदिन्हो हांणी एके कार्यावळींत उलयतना सांगलें. दाबोळी विमानतळ बंद जातलो अशें सांगपी लोकांक तांणी लक्ष्य केलें.
उच्च दाबाच्या वीज वाहिन्यांचे कंडक्टर्स बदलून ते सुवातेर उंचेल्या तांकीचे नवे कंडक्टर्स बसोवपाच्या कामाचो शुभारंभ मंत्री गुदिन्हो हांचे हस्तुकीं जालो. ह्या वेळार वास्कोचे आमदार कृष्णा साळकार, चिखलीचे सरपंच कमलाप्रसाद यादव आनी हेर मानेस्त हाजीर आशिल्ले.
दाबोळी विमानतळ बंद जावचो ना. जर बंद करपाचोच आशिल्लो जाल्यार आमी दाबोळी विमानतळार सुमार तेराशें कोटी रुपया खर्च करतले आशिल्ले? असो प्रस्न तांणी केलो. कांय जाण बऱ्या गजालीक गरजे भायर विरोध करून लोकांची दिशाभूल करीत आशिल्ल्याचो दावो तांणी केलो.
फुडारांत हवाई प्रवाशांची संख्या वाडटली. ताका लागून दाबोळी विमानतळाची गरज आसतली. दाबोळी विमानतळ हो पोरणो आनी भारतीय विमानतळ प्राधिकरणाचो आसा. जाल्यार मोपा विमानतळ हो खाजगी कंपनीचो आसा. विमानां खातीर लागपी इंधन मुरगांवांतल्यान मोपा विमानतळा मेरेन वाहिन्यांतल्यान वा टँकरींतल्यान व्हरचें पडटलें. ताका लागून इंधनाचो खर्च वाडटलो. जेणे करून ते सवाय दरान हवाई सेवा पुरोवंक शकचें नात अशें तांणी स्पश्ट केलें.
नव्या आनी उच्च तांकीचे कंडक्टर्स हे वेर्णां उपस्थानक ते सांकवाळ उपस्थानक, थंय सावन कदंब बस स्टॅण्ड वास्को उपस्थानक मेरेन बदलतले. हाका लागून विद्युत प्रवाह खंडीत जावपाचे प्रकार उणे जातले अशें गुदिन्हो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
