भांगरभूंय | प्रतिनिधी
दुबावीत मंजुप्पा बाजंत्रीक हावेरी कर्नाटकांतल्यान अटक
म्हापशें: माडेल-थिये रावपी यल्लाम्मा नागाप्पा उर्फ नागेश बेनीकाल (35, रा. बिजापूर कर्नाटक) हिचो गळो चिरून आनी उपरांत बांयंत उडोवन खून केल्ल्या प्रकरणांत मंजुप्पा उर्फ मंजू बाजंत्री (38, रा. हावेरी कर्नाटक) ह्या दुबाविताक अटक केली. दुसऱ्या मनशा कडेन लागसारपण केल्ल्याचे तिडकींतल्यान दुबावितान हें कांड केल्ल्याचें चवकशेंतल्यान स्पश्ट जालां.
फाटल्या शुक्रारा 4 नोव्हेंबर दिसा हो खुनाचो प्रकार उक्ताडार आयिल्लो. धानवा-थिये एके घराचे फाटले वटेन आशिल्ले पडीक बांयंत मयतीची कुशिल्ले अवस्थेंत कूड सांपडली. तिच्या कमराक फातर बांदून तिका बांयंत उडयिल्ली. पुलिसांनी असैमीक मरण म्हूण प्रकरण नोंद केल्लें.
गांवांतलीं बायलां एके बायलेची कूड बांयंत सांपडिल्ल्याची चर्चा करताल्यो. ही चर्चा यल्लाम्माची कागाळदार भायण रेणुका चिकराई (थिवी) हिच्या कानार पडली. ताणें आपल्या घरा यल्लाम्माची चवकशी केले उपरांत ती घरा येवंक नाशिल्ल्याचें समजलें.
रोखडेंच आयतारा 6 वेर सांजवेळा रेणुकान कोलवाळ पुलीस स्टेशनार वचून मरण आयिल्ले बायले विशीं विचारपूस केली. आपली भयण यल्लाम्मा बेकिनाल ही बेपत्ता आशिल्ल्याचे तिणें सांगलें. मयतीच्या आंगार सांपडिल्ली पैजन आनी मुदयेची वळख तिणें पटयली. उपरांत ही कूड यल्लाम्माचीच आशिल्ल्याचें स्पश्ट जालें आनी पुलिसांनी मयतीचो प्रियकर मंजुप्पा हाचे आड खुनाचो गुन्यांव दाखल केलो.
दुबावीत आरोपी हावेरी कर्नाटकांत आशिल्ल्याची म्हायती मेळटकूच पुलीस पंगड आयतारा रातींच कर्नाटकांत गेले. केरीमट्टीहळ्ळी गांवांत दुबावीत आरोपी आपल्या सोयऱ्यांच्या घरा लिपून बशिल्लो. सोमारा सकाळीं थळाव्या पुलिसांच्या आदारान पुलीस पगडान मंजुप्पा बाजंत्रीक ताब्यांत घेतलो आनी गोंयांत हाडून अटक केली.
पुलीस अधिक्षक शोबीत सक्सेना, उपअधिक्षक जिवबा दळवी, निरिक्षक परेश नायक, सोमनाथ माजीक हांंच्या मार्गदर्शना खाला उपनिरिक्षक मंदार परब, सुशांत सांगोडकार, सोनम वेरेंकार, हवालदार रामा नायक, कॉन्सटेबल प्रकाश पोळेकार, अक्षय पाटील आनी सदाशीव परब ह्या पंगडान ही कामगिरी केली.
हो खुनाचो प्रकार 14 ऑक्टोबराक सकाळीं घडिल्लो. दुबावितान मयतीक धानवा हांगासरले पडीक घरांत व्हेली. थंय तांची झगडीं जाली. ह्या वेळार दुबावितान तिचो सुरयेन गळो कापलो, आनी तिका मरण आयिल्ल्याचें समजतकूच तिचे कमराक फातर बांदून तिका घरा फाटले बांयंत उडयली. ह्या खुना उपरांत दुसऱ्या दिसा 15 वेर दुबावीत आपल्या गांवघरा गेलो आनी शेजारच्या गांवांत आपल्या सोयऱ्यांगेर लिपून बशिल्लो. दुबावीत आरोपी आंकवार आसा.
कांय वर्सां पयलीं यल्लाम्मा आनी मंजुप्पा हांची वळख जावन ताचे रुपांतर इश्टागतींत जालें. मंजुप्पाचे यल्लाम्माच्या घरा यो-वच आशिल्लें. कांय दिसां पयलीं मयत यल्लाम्माचे दुसऱ्या एका तरणाट्या बरोबर इश्टागत जाली. हो प्रकार मंजुप्पाक खटकलो आनी यल्लाम्मा आपल्याक टाळत आशिल्ल्याची जाणीव ताका जाली. घडणुकेच्या आदल्या दिसा दुबावितान मयतीच्या त्या इश्टाक फोन केलो आनी जाप विचारून धमकायलो. उपरांत घडणुकेच्या दिसा मयतीक घडणूक थळार व्हरून तिची समजूत काडपाचो यत्न केलो. पूण ती आयकना तें पळोवन तिडकी भितर तिचो खून केल्ल्याची कबुली दुबावीत मंजुप्पान दिली.
मयत यल्लाम्मा आनी दुबावीत आरोपी मंजुप्पा हे दीसवड्याचे कामगार म्हूण म्हापश्यां काम करताले. माडेलांत भाड्याचे कुडींत मयत यल्लामा बरोरब तिचो 15 वर्सां पिरायेचो पूत रावतालो. जाल्यार तिचो घरकार आनी 13 वर्सां पिरायेची धूव गांवघरा हावेरी (कर्नाटक) रावतालीं. 14 ऑक्टोबराक घरांतल्यान भायर सरिल्ली आपली आवय परतून घरा येवंक नाशिल्ल्याचें पुतान आपल्या बापायक सांगलें. 15 वेर ताचो बापूय गोंयांत आयलो आनी पुताक घेवन घरा गेलो. पूण मयतीची विचारपूस वा ती बेपत्ता आशिल्ल्याची कल्पना ताणें पुलिसांक दिली ना. दुबावीत आरोपी मंजुप्पा हो धुळेर म्हापश्यां भाड्याचे कुडींत रावतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
