कळंगूटे फुटपाथ विक्रेत्यांचेर कारवाय

भांगरभूंय | प्रतिनिधी

रेन्ट अ बायकाचेरूय कारवाय करपाची सरपंचाची शिटकावणी

म्हापशें: कळंगूटे रस्त्याचे कुशीक टेबल घालून खाद्य पदार्थ विकपी 30 विक्रेत्यांचेर दंडात्मक कारवाय केली. तशेंच येरादारीक आडखळ थारिल्ल्या आनी रस्त्याचे कुशीक पार्क केल्ल्या रेन्ट अ बायक दुचाकींचेरूय पंचायती वतीन कारवायेची मोहीम हातांत घेतल्या.

रस्तो रुंदीकरण क्षेत्र, फुटपाथ आनी भौशीक सुवातींनी वेवसाय करतले दुकानदार आनी गाडेकारांक पंचायतीन भौशीक सुचोवणी नोटीस जारी करीत सात दिसां भितर वेवसाय बंद करपाचो आदेश दिला. नाजाल्यार वेवसायाचेर कारवाय करून तो काडून उडयतले, आनी हे कारवायेचो खर्च संबंदितां कडल्यान वसूल करतले अशी शिटकावणी पंचायतीन दिल्या. पंचायतीचे पळोवणे प्रमाण सुमार 50 परस चड गाडे गांवांत आसात.

सोमारा सकाळीं सरपंच जोजफ सिक्वेरा आनी पंचायत मंडळ आनी कर्मचाऱ्यांच्या पंगडान रस्त्याचे कुशीक टेबल घालून इडली आनी खाद्य पदार्थांचे विक्रीचेर कारवायेची मोहीम हातांत घेतली. खोब्रावाडो ते कळंगूट असोसिएशन मैदाना पसून बांदोडकार दर्यादेगे मेरेन तशेंच बागा दर्यादेगे मेरेन ही मोहीम राबयली.

सरपंच जोजफ सिक्वेरा हांणी हे कारवाये विशीं उलयतना सांगलें, आमी हाचे पयलींच फुटपाथ आनी रस्त्याचे कुशीक सुरू केल्ले सगले वेवसाय बंद करपाचे निर्देश दिल्यात. हे कारवाय मोहिमे खाला 30 वेवसायिकांचेर कारवाय करीत दंड घाला.

अशा उक्तडार करतल्या वेवसायाचेर गांवाचेर वायट प्रभाव पडटा. तशेंच कळंगूट टिटो जंक्शन पसून दर्यादेगे कडेन वचपी रस्त्याचे कुशीक पार्क करतल्या रेन्ट अ बायक दुचाकींचेर कारवाय करतले अशें सिक्वेरान म्हणलें.

हो पट्टो गर्देची सुवात आसा. रस्ते व्हड आसले तरी लेगीत दुचाकी उब्यो केल्ल्यान येरादारीची कोंयडी जाता. येरादारी सुरळीत जावची म्हूण आमी हो ‘नो पार्कींग’ झोन करतले. रस्त्याचे कुशीक दुचाकी पार्क करपी धनयांचेर कारवाय करतले अशें सिक्वेरान स्पश्ट केलें.