भांगरभूंय | प्रतिनिधी
पणजी म्हापालिकेन कारवाय करपाची मागणी
पणजी: सरकारी इमारती तशेंच खाजगी वेवसायीक इमारतींतले एसीचें उदक फुटपाथार सोडत आशिल्ल्यान गोवा कॅना वतीन काल (बुधवारा) पणजेंत जाग्याजाग्यार सत्री निदर्शनां केलीं. पणजी म्हापालिकेन ज्यो इमारती एसीचें उदक फुटपाथार सोडटात तांचेर कारवाय करपाची मागणी गोवा कॅनाचे रोलाण्ड मार्टिन्स हांणी केली.
पणजेंत जाग्याजाग्यार सरकारी इमारती वा हेर खाजगी वेवसायीक इमारती तशेंच रहिवाशांच्या इमारतीच्या एसीचें उदक रस्त्या वयल्या फुटपाथार सोडटात. ताका लागून हाचो त्रास फुटपाथा वयल्यान चलून वचपी लोकांक जायत आसता. पूण कोणूच हाची दखल घेनात. आमी तांच्या एसीच्या विरोधांत ना, पूण सर्वसामान्य जे लोक फुटपाथा वयल्यान चलून वतात अशा लोकांक त्रास जावचो न्हय अशें मार्टिन्स हांणी म्हणलें.
एसीचें उदक वेवस्थीत भायर वचपा खातीर योग्य प्रमाणांत पायपाचें नियोजन करचें. सरळ एसीचें उदक रस्त्यार सोडचें न्हय. हाका लागून वरिश्ठ नागरीक, पर्यटक तशेंच हेर सर्वसामान्य लोक निसरून पडपाची शक्यताय आसा अशें रोलाण्ड मार्टिन्स हांणी म्हणलें.
पणजी म्हापालिकेन ह्या प्रकरणाची गंभीर दखल घेवची. ज्या इमारतींनी एसीचें उदक फुटपाथार सोडटात तांचे आड खर कारवाय करची. आमी देशभर हो विशय पावयतले. सामान्य लोकांक त्रास दिवपाचो कोणाकूच अधिकार ना अशेंय ह्या वेळार मार्टिन्स हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
