भांगरभूंय | प्रतिनिधी
रान खात्यान कारवाय करपाची लोकांची मागणी
फोंडें: तिस्क उसगांव ते धारबांदोडें वाठारांत सद्या रातच्या वेळार रानवटी जनावरांच्या कासाक ओतो आयला. वाठारांत रातच्या वेळार आर्म घेवन तशेंच भुंयेंत बॉम्ब पुरून कास करीत आशिल्ल्यान लोकांक रानांत वचप घातक जालां. रान खात्यान वाठारांत गस्त घालून बेकायदो कास करप्यांचेर कारवाय करपाची मागणी लोकां कडल्यान जायत आसा.
तिस्क उसगांव, पिळयें, प्रतापनगर आनी धारबांदोडें वाठारांत रानवटी जनावरांचो उपद्रव वाडला. रानवटी जनावरांची कास करपा खातीर रातच्या वेळार खूबशे जाण आर्मां घेवन भोंवत आशिल्ल्याचें समजता. वाठारातं 4 ते 5 दिसा पयली दोन रानदुकरांची कास करून मांस उक्तेपणान विकिल्लें.
तशेंच 15 दिसां पयलीं लेगीत एका रानवटी जनावराची कास करून मांसाची विक्री केल्ल्याची म्हायती उक्ताडार आयिल्ली. उपरांत वाठारांत रातच्या वेळार खूबशे जाण कासाक वचत आशिल्ल्याचें उक्तें जालें. रानवटी मांसाक व्हड प्रमाणांत मागणी आशिल्ल्यान कासादोर वाठारांत तळ ठोकून रानांत रावत आशिल्ल्याचो दुबाव आसा. फाटल्या कांय वर्सां सावन रानदुकर तशेंच हेर रानवटी जनावरांचो संचार वाडला. ताका लागून कांय खास व्यक्ती कडल्यान जनावरांची कास करतात.
हाचे पयलीं बॉम्ब पुरून रानवटी जनावरांची कास करताले. ताका लागून खूबशीं सुणीं तशेंच गोरवां बॉम्बाचो स्फोट जाल्ल्यान जखमी जावपाचे प्रकार हाचे पयलीं घडिल्ल्याची म्हायती थळाव्या लोकां कडल्यान मेळ्ळ्या.
भुंयेंत बॉम्ब पुरून जनावरांची कास करीत आशिल्ल्यान थळाव्या लोकांक रानांत वचप घातक जालां. वाठारांतलीं बायलां व्हड प्रमाणांत रानांत लांकडा हाडपा खातीर वतात. बायलांचो पांय भुंयेंत पुरिल्ल्या बॉम्बाचेर पडत जाल्यार स्फोट जावन व्हड दुर्घटना घडपाची शक्यताय उक्तायतात.
फाटल्या कांय दिसां सावन रानवटी जनावरांच्या कासाक ओतो आयिल्लो आसलो तरी अजून मेरेन रान खात्याच्या पंगडा कडल्यान कारवाय जावंक नाशिल्ल्यान थळावे लोक दुबाव उक्तायतात.
रान मंत्री विश्वजीत राणे हाचे कडेन गंभीरतायेन लक्ष घालून वाठारांत कास करप्यां आड खर कारवाय करपाची मागणी थळाव्यां कडल्यान जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
