भांगरभूंय | प्रतिनिधी
उजो कोणे तरी लायिल्ल्याचो उपसरपंच गिरीश पिल्लेचो आरोप
वास्को: मंगळारा रातीं 12.15 वरांच्या सुमाराक सांकवाळ पंचायतीच्या कोयरा प्लांटाक उजो लागून बेलींग मशीन आनी शेडीचें व्हड प्रमाणांत लुकसाण जालें. वेर्णें, वास्को तशेंच झुआरी नगरांतल्या उजो पालोवपी दळांनी सुमार चार वरां खर कश्ट घेतले उपरांत फांतोडेर उज्याचेर नियंत्रण मेळयलें. ह्या उज्यांत सुमार पांच लाख रुपयांचें लुकसाण जालां. जाल्यार 15 लाख रुपयांची मालमत्ता वाटायिल्ल्याचें वेर्णें उजो पालोवपी दळाचे दिलीप बिचोलकार हांणी सांगलें.
मजगतीं, हो उजो शॉर्ट सर्किटाक लागून लागूंक नाशिल्ल्यान तो कोणे तरी लायिल्ल्याचो आरोप सांकवाळचे उपसरपंच गिरीश पिल्ले हांणी केलाे. ह्या प्रकरणांत आमी वेर्णें पुलीस स्टेशनार कागाळ करतले अशें तांणी सांगलें.
सांकवाळ पंचायतीचो कोयरा प्लांटाची शेड झुआरीनगर सांकवाळ हांगा आसा. हे शेडीक उजो लागिल्ल्याची म्हायती वेर्णें उजो पालोवपी दळाक मंगळारा रातीं 12.15 वरां उपरांत मेळ्ळी. उजो पालोवपी दळाचे जवान ताकतिकेन पावलें. थंय वास्को उजो पालोवपी दळ आनी झुआरी कंपनीचे उजो पालोवपी दळाचे बंब लेगीत पावले. व्हड प्रमाणांत एकठांय जाल्ल्या कोयरांतल्यान उजो धुमसत आशिल्ल्यान थंयचो कोयर विस्कळीत करपा खातीर जेसीबीची गरज आशिल्ली. पूण रात आशिल्ल्यान ती पुराय करूंक आयली ना.
मजगतीं उजो पालोवपी दळाच्या जवानांनी खर यत्न करून फांतोडेर चार वरांच्या सुमाराक उजो नियंत्रणांत हाडलो. पूण त्या कोयरांतल्यान धुंवर मात धुमसत आशिल्लो. सकाळीं पुराय उज्याचेर नियंत्रण दवरलें.
ह्या उज्या विशीं पिल्ले हांणी दुबाव उक्तायला. कोणे तरी विघ्नसंतोषी मनशान हो उजो लायला आसुये. आमी सांकवाळ पंचायत वाठारांत नितळसाण दवरपा खातीर यत्न करीत आसात. आमी लोकांक ओलो आनी सुको अशे वर्गीकरण करून कोयर दिवपाचे सेगीत आवाहन करतात. पूण लोक आयकनात. ताका लागून शेडींत कोयर एकठांय करून ताचें वर्गीकरण करपाचें काम करचें पडटा. ताका लागून शेडींत व्हड प्रमाणांत कोयर एकठांय आशिल्लो. ह्या कोयराक उजो लागलो. ताका लागून ह्या प्रकरणाची चवकशी जावपाची गरज पिल्लेन उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
