पुर्तुगाल

भांगरभूंय | प्रतिनिधी

पुर्तुगालाचे उत्तरेक आनी पुर्वेक स्पेन, दक्षीण आनी पश्चिमेक अटलांटीक म्हासागर, पश्चीम आनी दक्षीण-पश्चीम वटेंत अजोर्स आनी मडियरा जुंवे आसात. सुरवातेक पुर्तुगाल स्पेनाचो भाग आशिल्लो. उपरांत पुर्तुगालाक स्वतंत्रताय मेळ्ळी. ह्या देशान, एका तेंपार, आतां स्वतंत्र जाल्ल्या सुमार 53 देशांचेर राज्य केल्लें. लिस्बन, पोर्तू, मिन्हो, अव्हेरो हीं पुर्तुगालांतलीं मुखेल शारां. ह्या देशांत प्रजासत्ताक राजवट चलता. पुर्तुगेज ही पुर्तुगालांतली मुखेल भास. पुर्तुगालांतले चडशे लोक क्रिस्तांव धर्माचे.
लिस्बन – लिस्बन ही पुर्तुगालाची राजधानी. पुर्तुगालाचें अर्थीक आनी संस्कृतीक केंद्र म्हणून लिस्बनाक वळखतात. ह्या शारांत व्हांवपी टेगस न्हंयचे देगेर ल्हान ल्हान दोंगुल्ल्यो आसात. 1755 वर्सा, तीन-तृतियांश शार भूंयकांप आनी हुंवारांत नश्ट जाल्लें. उपरांत हें शार नव्यान उबारलें. खाणां-जेवणां, संगीत, नाच, खेळ अशा वेगवेगळ्या मळांचेर लिस्बन जगभर प्रसिद्ध आसा. ह्या वाठारांत, थळावे तशेंच पर्यटकां खातीर ट्रॅम येरादारी खातीर म्हत्वाचें माध्यम थारता.
जुंवे – मडियरा जुंव्यां भितर अटलांटीक म्हासागरांतल्या आठ जुंव्यांचो आसपाव जाता. मुखेल भुंये परस सुमार 1000 किलो मिटर पयस आशिल्ल्या ह्या जुंव्यांचेर ज्वालामुखी फुट्टात. मडियरा आनी पोर्तू सांतो हे जुंवे सोडले जाल्यार हेर जुंव्यांचेर लोकवस्ती ना. मडियरा जुंव्याचे पुर्वे वटेन वाळवंट आशिल्ल्यान तितली लोकवस्ती ना. पोर्तू सांतो जुंवो हो सपाट आनी सकयले वटेंतलो वाठार. मध्य अटलांटीक म्हासागरांतले णव जुंवे मेळून अजोर्स जुंवे जातात. सांता मारिया, फ्लोर्स, कोर्वो सां जोर्ज, पिको सां मिगेल हे ह्या वाठारांतले जुंवे. ह्या जुंव्यांचेर लेगीत ज्वालामुखी फुट्टात. दर्यावेळो, दोंगुल्ल्यो, तळीं हांकां लागून हे जुंवे आनीक सोबीत दिसतात.
कॉर्क उत्पादक – पुर्तुगाल हो देश कॉर्क उत्पादनांत संवसारांत आघाडीचेर आसा. ‘ऍवरग्रीन कॉर्क ओक’ ह्या झाडाच्या खोडा पासून कॉर्क तयार करतात. वायन बाटल्यां खातीर स्टॉपर, मॅटींग, टायल्स ह्या सारकिल्या उत्पादनांक कॉर्काचो वापर जाता.
नुस्तेमारी – नुस्तेमारी हो पुर्तुगालाचे संस्कृतायेचो म्हत्वाचो घटक. दर्यांतलें तशेंच साव्या उदकाचें नुस्तें धरून ताचो वेवसाय पुर्तुगालाक चलता. सागरी नुस्तेमारीचे ल्हान-व्हड उद्देग पुर्तुगालाक स्थापन जाल्यात. बांगडे, हाडो बांगडे, ताल्ले सारकिले नुस्तें धरून ताचें तेल काडून तशेंच डब्यांनी नुस्तें पॅक करून वेगवेगळ्या देशांनी ताची निर्यात जाता.
संस्कृताय – सर्कल नाच, विरा, टू स्टॅप वॉल्ट्झ, फॅन्डांगो, कोरदिन्हो सारकिले लोकनाच पुर्तुगालाक आसात. अजोर्स वाठारांत ‘चामारिटा’ ह्या नांवांन हेच नाच वेगळे तरेन सादर जातात. पुर्तुगाली लोकसंगितांत लोकांचो आनी पिळग्यांचो इतिहास काव्यमय पद्दतीन येता. गिटार, मांडोलीन, बॅगपायप, वायोलीन, ड्रम, पुर्तुगेज गिटार सारकिलीं वाद्यां ह्या पारंपारीक संगितांत वापरतात. फादो हो संगीत प्रकार पुर्तुगालांतल्या लिस्बन आनी कॉयिम्ब्रा ह्या शारांनी मेळटा. लिस्बनांतलो फादो प्रकार चड लोकप्रिय. संवसारांतल्या पोरण्या शारी लोकसंगिता भितर फादो संगिताचो आसपाव जाता. कार्नवाल हो पुर्तुगालांतलो सगळ्यांत मोटो महोत्सव. फेब्रुवारी म्हयन्यांत जावपी ह्या महोत्सवांत नाच, संगीत, खाणां-जेवणां, वेगवेगळे भेस हे म्हत्वाचे घटक थारतात.
पुर्तुगाल आनी गोंय नातें – वास्को द गामा ह्या पुर्तुगाली दर्या भोंवडेकारान पश्चिमी युरोपांतल्यान आशियेक पावपाची वाट सोदून काडली. ते खातीर, पुर्तुगेजांनी भारतीय म्हासागरांतल्यान वेपाराचेर कब्जो केलो. 1510 वर्सा आल्फोंसो दे आल्बुकेर्क हांणी गोंय काबीज केलें. गोंया सयत दमण, दादरा आनी नगर हवेली, आनी दिव हे वाठार हातासले. सुमार 450 वर्सां गोंय पुर्तुगेजांच्या ताब्यांत उरलें. ते खातीर पुर्तुगाली नाच, संगीत, खाणां-जेवणां आनी हेर संस्कृतायेचो गोंयचेर मोटो प्रभाव पडिल्लो दिसता.

स्नेहा सबनीस
9923633789