भांगरभूंय | प्रतिनिधी
फोंडें: धारबांदोड्यां घातक जंक्शना कुशीक सकाळीं 11.30 वरांच्या सुमाराक रस्त्याचे कुशीक पार्क केल्ले टेंपोक दुचाकीचो धपको बसून दुचाकी चालक मल्लेश बसप्पा देवलतकर (34, खानापूर-कर्नाटक) हो गंभीर जखमी जालो. जखमीचेर गोमॅकाँत उपचार सुरू आसात.
पुलिसांनी दिल्ले म्हायती प्रमाण बिरेस्तारा सकाळीं एमएच 12 एचडी 5752 क्रमांकाचो टेंपो रस्त्याचे कुशीक पार्क करून चालक सांवड्ड्यां गेल्लो. मोलें सावन फोंडेंचे दिशेन येवपी जीए 08 एके 8849 क्रमांकाचे दुचाकीचो धपको रस्त्याचे कुशीक पार्क केल्ल्या टेंपोक बसलो. रस्त्या वयल्यान आवय-बापाय सयत वचपी चली अचकीत मुखेल रस्त्यार आयिल्ल्यान चलयेक वाटावपा खातीर दुचाकी कुशीक घेता आसतनाच चालकाचो दुचाकी वयलें नियंत्रण सुटिल्ल्यान हो अपघात जालो. जखमीक खाजगी वाहनांतल्यान पिळयां मुळाव्या भलायकी केंद्रांत दाखल केले उपरांत अदीक उपचारा खातीर गोमॅकाँत धाडून दिलो. फोंडें पुलिसांनी अपघाताचो पंचनामो केला.
थळाव्यांनी दिल्ले म्हायती प्रमाण बिरेस्तारा सकाळीं जाल्ल्या अपघात थळार बुधवारा लेगीत एक मोटार अपघातांत सांपडिल्ली. पूण बुधवारा जाल्ल्या अपघातांत कोणूच जखमी जावंक नाशिल्लो.
मजगतीं, बुधवारा ढवळे दोन दुचाकी मदीं जाल्ल्या अपघात प्रकरणांत फोंडें पुलिसांनी मुकेश हेक्टर हाचे आड गुन्यांव नोंद केला. अपघातांत मुकेश हेक्टर जखमी जाल्लो. जाल्यार श्रेया कोठरकार हे विद्यार्थिनीक मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
