बोगदा मैदानाची दुर्दशा

भांगरभूंय | प्रतिनिधी

थळाव्या आमदारान लक्ष घालपाची मागणी

वास्को: आदले मंत्री मिलिंद नायक हांच्या यत्नाक लागून वास्को बोगदा बांदिल्ल्या मैदानाची दुर्दशा जाल्या. ह्या प्रकरणांत संबंदीत खात्यान आनी मुरगांवचे आमदार संकल्प आमोणकार हांणी लक्ष घालचें अशी मागणी थळाव्या लोकांनी केल्या. ह्या मैदानार आशिल्ली इमारत, शौचालय आनी निर्जन सुवातेचो वापर घुंवळे वखदां घेवप, सोरो पियेवप हे खातीर वापर करीत आशिल्ल्याचो दावो करतात. बोगदा आनी वाठारांतल्या तरणाट्यां खातीर बांदिल्ल्या ह्या मैदानाची दुर्दशा जाल्ले खातीर संबंदीत खात्या विशीं विवीध प्रतिक्रिया उक्तायतात.

बोगदा हांगासरल्या तरणाट्यांक खेळपा खातीर मैदान आसचें हे खातीर आदले मंत्री मिलिंद नायक हांणी खासा लक्ष घालून सुंदर अशें मैदान तयार करून घेतिल्लें. ह्या मैदानाचें उक्तावण ऑक्टोबर 2016 वर्सा तेन्नाचे खेळां मंत्री रमेश तवडकार हांचे हस्तुकीं जाल्लें.

गोंय मुळाव्या साधन सुविधा म्हामंडळा वतीन ह्या मैदानाचो विकास केल्लो. त्या वेळार म्हामंडळाचे अध्यक्ष डॉ. प्रमोद सावंत आशिल्ले. ह्या मैदानाक लागून थळाव्या तरणाट्यांची सोय जाल्ल्यान ते सुखाविल्ले. तशेंच सांजवेळा लोकांक थंय विसवा खातीर खासा सोय केल्ली. एकूण ह्या सुसज्ज मैदानाक लागून लोक आदले मंत्री नायक हांकां धन्यवाद दिताले.

पूण फाटल्या स वर्सांत ह्या मैदानाची दुर्दशा जाल्या. ह्या मैदानाची देखभाल करपा खातीर खेळां खात्यान पूर्णपणान आडनदर केल्ल्याचें दिसून येता. ताका लागून लाखांनी रुपया खर्च करून बांदिल्ल्या ह्या मैदानाची पुरायपणान दुर्दशा जाल्या.

ह्या प्रकरणांत खेळां मोगी शंकर पोळजी हांणी म्हणलें, ह्या मैदानाक लागून थळाव्या तरणाट्यांची सोय जाल्ली. ह्या मैदानाची योग्य देखभाल करपाची गरज आशिल्ली. पूण हांगा सुरक्षा रक्षक, देखरेख करपी व्यक्ती अशें चित्र दिसून येना. ताका लागून शौचालयां, मैदानाची इमारत ही अनैतीक कृत्यां करपाचो एक अड्डो जाल्ल्याचें तांणी म्हणलें.

मैदान वाठारांत बांदिल्ल्या शौचालयांची, मुताऱ्यांची मोडतोड केल्या. थंय सोऱ्यांच्या बाटल्यांच्यो राशी पडिल्ल्यो दिसतात. दारांची, जनेलांची मोडतोड जाल्या. मैदानार रानटी झोंपा, तण वाडलां. ह्या प्रकरणांत थळावे आमदार संकल्प आमोणकार हांणी लक्ष घालपाची गरज आसा. जेणे करून तरणाट्यांक ह्या मैदानाचो लाव घेवंक मेळटलो अशी प्रतिक्रिया कांय जाणांनी उक्तायली.