भांगरभूंय | प्रतिनिधी
हरियाणांतल्या खाप म्हापंचायतीची मागणी
पणजी : भाजप फुडारी आनी अभिनेत्री सोनाली फोगट खून प्रकरणाचो तपास सीबीआय कडेन दिवचो अशी मागणी हरियाणांतल्या खाप म्हापंचायतीन केल्या. हाचे पयलीं सोनालीच्या कुटुंबान सीबीआय चवकशेची मागणी केल्ली.
सोनाली फोगटाक दुबावीत रितीन मरण आयिल्लें. खुनाचो गुन्यांव नोंद जावन तपास सुरू आसा. खुनाचो उद्देश सोदून काडप, पुलिसांक अजून शक्य जावंक ना. हरियाणाच्या मुख्यमंत्र्यांनी लेगीत मुख्यमंत्री डॉ. प्रमोद सावंत हांचे कडेन तपासा विशीं चर्चा केल्या. पुलीस योग्य दिशेन तपास करतात. तपास एका निश्कर्शा मेरेन येतलो असो विस्वास पुलीस म्हासंचालक जसपाल सिंग हांणी उक्तायला.
खाप म्हापंचायतीन तपास सीबीआय कडेन दिवपाक शुक्रार मेरेन मुजत दिल्या. सोनाली फोगट हिका 23 ऑगस्टाक दुबावीत रितीन मरण आयिल्लें. मरण आयलें उपरांत तिका हॉस्पिटलांत दाखल केल्ली. ह्या प्रकरणांत गोंय पुलिसांनी पयलीं सैमीक रितीन फोगट हिका मरण आयिल्ल्याचें नोंद केल्लें. पूण फोगट हिचो भाव रिंकू ढाका हांणी गोंयांत आयले उपरांत आपले भयणीचो खून जाल्ल्याचो दुबाव उक्तावन चवकशी करपाची मागणी केली. गोमॅकाँत फोगट हिच्या कुडीचो पोस्टमार्टेम जाले उपरांत तिचे कुडीचेर घावे दिसून आयले. तशेंच तिणें उदकांतल्यान ड्रग्स घेतिल्ल्यान मरण अायिल्ल्याचें स्पश्ट जाल्लें. ते उपरांत पुलिसांनी खुनाचो गुन्यांव नोंद करून तपास सुरू केलो. आतां मेरेन पुलिसांनी 5 जाणांक अटक केल्या.
खून प्रकरणांतले मुखेल दुबावीत सुधीर सांगवा आनी सुखविंदर पाल सिंग हांकां पयलींच अटक जाली. सुधीर सांगवा आनी सुखविंदरपाल सिंग हांची चवकशी सुरू आसा. ह्या खून प्रकरणांत आनीक दुबावीत घुस्पल्ल्याचो दुबाव आशिल्ल्यान पुलिसांनी अदीक तपास सुरू केला. ते खातीर पुलिसांचो एक पंगड हरियाणांत आसा.
हणजूणच्या रामा मांद्रेंकारान घुंवळे वखदां दत्तप्रसाद गांवकाराक दिलीं. दत्तप्रसाद गांवकारान तीं सुधीर सांगवाक विकलीं अशी म्हायती उक्ती जाल्या. घुंवळे वखदां पियेवपाक दिवपाचो प्रकार कर्लीस बीच क्लब शॅकांत जालो.
कर्लीस रॅस्टोरंण्टाच्या शौचालयांत 2.2 ग्रॅम मेटाफेटामायन घुंवळे वखद मेळ्ळें उपरांत एडवीन नूनीस हाका पुलिसांनी अटक केल्ली. पेंयांत घुंवळे वखद घालून दिल्ल्यान सोनालीक मरण आयलें. सुधीर सांगवा आनी सुखविंदरपाल सिंग हांणी हें पेय दिलां असो निश्कर्श आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
