विरोधी पक्षां कडेन युती करपाक आप तयारः वाल्मिकी

भांगरभूंय | प्रतिनिधी

पणजीः 2027 चे वेंचणुकेत विरोधी पक्षां वांगडा युती करपा खातीर आम आदमी पक्षान अधिकृत रितीन जाहीर केला. 2027 ही वेंचणूक फकत सत्ता मेळोवपा खातीर न्हय जाल्यार ही भाजपा आड वैचारीक लडत आसा. जर थीर सरकार दितले जाल्यार युतींचे 35 परस चड सुवातो वेचून येवप भोवगरजेचें आसा, अशें आपचे गोंय अध्यक्ष वाल्मिकी नायक हांणी सांगलें.

पणजे आपचे कचेरेत घेतिल्ले पत्रकार परिशदेत वाल्मिकी नायक उलयताले. ह्या वेळार वेळ्ळीचे आमदार क्रुझ सिल्वा आनी हेर फुडारी हजर आसले.

पुराय भारतभर आमची संविधान आनी लोकशाय वाटोवपा खातीर वैचारीक लढो सुरू आसा. पुण गोंयांत ही लडत गोंय साल्वार करपा खातीर आसा, अशें नायक हांणी सांगलें.

बिल्डर आनी कॅसिनो लॉबी वांगडा भाजप सरकार गोंय काबार करपाक मुखार सरला. गोंयची जमीन, पर्यावरण आनी वळख विकपाक काडल्या. देखून 2027 ही फकत सत्तेत येवन सरकार बदलपा सारकी वेंचणूक वा चड आमदार वेंचून हाडप वा स्वबळार सत्तेत येवप न्हय जाल्यार ही गंभीर वेंचणूक जावन आसा. जर भाजप सत्तेत आयली जाल्यार फुडली पांच वर्सा गोंय उरपाचें ना आनी हो धोको आमी पत्करपाक शकना, असो आरोप नायक हांणी केलो.

आमी भोवमतान सरकार घडयतले अशें खंयचोच पक्ष म्हणपाक शकना. जर खंयच्याय पक्षाक 21, 22 वा 23 सुवातींचें भोवमत मेळटा जाल्यार भाजपाक हे सरकारा उडोवपाक चार दीस लेगीत लागचेना. देखून आमकां उण्यांत उणें 35 सुवातींचें व्हड भोवमतान सरकार घडोवपाची गरज आसा. हे भोवमत साध्य केल्यारच सरकार थीर उरतले, असो युक्तीवाद नायक हांणी केला.

हे करतले जाल्यार सगळ्या पक्षांनी आपले वैयक्तीक मतभेद कुशीक दवरुन सगल्यां जाणांनी गोंया खातीर एकठांय येवचे पडटले. 2027 वेंचणुकेंत व्यापक रितीन हारोवपा खातीर आमी हेर विरोधी पक्षा वांगडा युती खातीर उक्ते आसात हे अधिकृत रितीन जाहीर करतात, अशें नायक हांणी म्हणलें.

हे जाहीर करतना आमची मात्शी वेगळी अास्त आसा. युती जाले उपरांत वास्तवीक बदल करपाचे पांवड्यार आमी पावपाक जाय. फुडली पांच वर्सा थीर रावपा खातीर पक्षफुटी कशी बंद करप हे विशीं चर्चा करून अंतर्गत कोफुसांव आनी अस्थिरता आमकां जाग्यार घालची पडटली. जर थीर सरकार आयले जाल्यार फुडल्या 5-10 वर्सा खातीर गोंय साल्वार करपाक आनी गोंयचे विशय घेवपा खातीर काम करचे पडटलें, असो उलो नायक हांणी मारला.