भांगरभूंय | प्रतिनिधी
पणजी : जमनीचे धनी आनी बिल्डर हांचे मदल्या वादाक लागून फ्लॅट नांवार नाशिल्ल्या हजारांनी फ्लॅटधारकांक फ्लॅट नांवार करप शक्य जावपा खातीर सरकारान म्हजो फ्लॅट येवजण सुरू केल्या. मंत्रिमंडळान हे येवजणेक मान्यताय दिल्या. सहकार कायदो तशेंच स्टँप ड्युटी कायद्यांत दुरूस्ती करपी अध्यादेशांक मान्यताय दिवन सरकारान हे येवजणेक मान्यताय दिल्या. हजारांनी फ्लॅटधारकांक हे येवजणेचो लाव जातलो, अशी आस्त मुख्यमंत्री डॉ. प्रमोद सावंत हांणी उक्तायल्या.
मंत्रिमंडळ बसके उपरांत मुख्यमंत्रान हे येवजणेची म्हायती दिली. ह्या वेळार सहकारी मंत्री सुभाष शिरोडकार आनी येणावळ सचीव संदीप जॅकीस हाजीर आशिल्ले.
गोंयांत बर्याच जाणांनी 30 ते 40 वर्सां पयलीं फ्लॅट विकते घेतिल्लें. बर्याच जाणां कडेन फकत फ्लॅट विकतो घेतिल्ल्या कबलातीचीं कागदपत्रां आसात. जमीन बिल्डराच्या वा डेवेलोपराच्या नांवाचेर आशिल्ल्यान तांच्या नांवार फ्लॅट जावंक ना. मालकी हक्क नाशिल्ल्यान दुरूस्ती वा रिडेवेलोपमेंट करपा खातीर लेगीत तांकां आडखळी येतात. युनिलेटरल डीम्ड कन्वेयन्साची प्रकीया सुटसुटीत करून फ्लॅट नांवार करपाची प्रक्रीया सरकारान निश्चीत केल्या. हाचे खातीर गोंय सहकारी सोसायटी कायदो 2001 तशेंच इंडियन स्टॅम्प ड्युटी कायद्यांत दुरूस्ती करपी अध्यादेशांक मान्यताय दिल्या. ते भायर स्टॅम्प ड्युटी उणी करपाचोय निर्णय घेतला. राज्यपालांच्या मान्यताये उपरांत ह्या अध्यादेशांची अधिसुचोवणी जारी जातली.
जमनीचो धनी आनी बिल्डर वा डेवेलोपर हांचे मदीं वाद आसलो तरी फ्लॅटधारकांक घरनिर्माण सोसायटी करप शक्य जातलें. बिल्डर वा डेवेलोपरांची मान्यताय नासतना जमीन सोसायटीच्या मालकीची जातली. वाद आसलो जाल्यार सहकार खातें हस्तक्षेप करून कन्वेयन्स डीड करतलो. हाका लागून पुराय इमारत वा फ्लॅटाची दुरूस्ती वा नुतनीकरण करप शक्य जातलें. हाचे खातीर अर्जदारांक 10 हजाराचें नोंदणी शुल्क भरचें पडटलें. तशेंच 1 हजारांची स्टॅम्प ड्युटी फारीक करची पडटली.
येवजणे खातीर वाठारा प्रमाण स्टँप ड्युटी थारतली. स्टँप ड्युटीचें वर्गीकरण करपी अधिसुचोवणी जारी जातली. दर्यादेग आनी शार वाठार अ गटांत, नगरपालिका वाठार ब गटांत आनी पंचायत वाठार क गटांत येतलो. शारी आनी दर्यादेग वाठारांक चड आनी गांवगिर्या वाठारां खातीर उणी स्टँप ड्युटी आसतली.
गोंयांत 2500 गृहनिर्माण सोसायट्यो आसात. दरेकी सोसायट्यांनी उण्यात उणें 10 फ्लॅट धरले तरी 25 हजार फ्लॅटधारकांक येवजणेचो लाव मेळप शक्य आसा, अशें सुभाष शिरोडकार हांणी सांगलें.
———————–
मंत्रीमंडळाचे हेर म्हत्वाचे निर्णय
रेल्वे स्टेशनाचेर साधनसुविधा उबारपा खातीर
रेलविकास निगम लिमिटेड कडेन (आरव्हीएनपीएल) एमओयू सुलभ इंटरनॅशनल भौशीक वाठारांचेर शौचालय उबारतले, व्हीबी जीराम जी येवजणेची कार्यवाय सुरू
———
चलयां खातीर आयटीआयचें शुल्क माफ
चलयांनी आयटीआय संस्थेंत व्हड प्रमाणांत प्रवेश घेवचो म्हूण सरकारान शुल्क माफ करपी मुख्यमंत्री सुकन्या कौशल्य विकास येवजणेक मान्यताय दिल्या. चलयां खातीर आतां आयटीआय मदीं शुल्क घेवचें नात, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
