भांगरभूंय | प्रतिनिधी
वाळपयः गोंय रान उदरगत म्हामंडळान वेवस्थापन केल्ले सगले घसघशे अंदूंच्या पावसाळी पर्यटन हंगामा खातीर पर्यटकांक उक्ते केल्यात. सैम मोगींक आनी पर्यटकांक आतां दुधसागर, पाली (शिवलिंग), चरावणें, नानेली, सांवरी आनी मैनापी ह्या सैमीक घसघशांची सोबीतकाय पळोवंक मेळटली. पर्यटकांक सुरक्षीत, वेवस्थीत आनी आनंददायक प्रवास सुनिश्चीत करपा खातीर सगल्या घसघशांचेर व्हड प्रमाणांत सुरक्षा उपाय केल्यात आनी प्रशिक्षीत मार्गदर्शक, रान कर्मचारी आनी गरजेच्यो सुरक्षा उपकरणां स्थापन केल्यात.
हे संबंदी म्हायती दितना गोंय रान उदरगत म्हामंडळाची अध्यक्षा डॉ. देविया राणे हांणी सांगलें, जीएफडीसी उदकाची पातळी, उदकाचो प्रवाह, हवामानांतले बदल आनी वाठारांतल्या परिस्थितीचेर सतत नदर दवरता. परिस्थिती प्रमाण घसघशांचेर प्रवेश नियंत्रीत करतले आनी व्हड पावस पडल्यार, उदकाचो प्रवाह अचकीत वाडल्यार वा प्रतिकूल हवामानाची परिस्थिती जाल्यार कांय काळ तात्पुरती प्रवेश बंद करपाचो निर्णय घेवंक मेळटा. देखून पर्यटकांनी रान खात्याचे आनी अधिकाऱ्यांच्या सुचोवण्यां प्रमाण आवाहन केलां.
पर्यटकांच्या सुरक्षे खातीर दर एका धबधब्याचेर प्रशिक्षीत मार्गदर्शक, रान राखणदार, सुरक्षेचे नोटीस बोर्ड, सुरक्षीत मार्ग, धोक्याच्या वाठारांनी प्रतिबंधीत वाठारांची चिन्नां आनी आणीबाणीच्या वेळार बेगोबेग मदत करपा खातीर गरजेची यंत्रणा घाल्यात. तशेंच चड दिसांनी पर्यटकांचो आंकडो नियंत्रीत करपाचेर खासा भर दितले.
तशेंच जीएफडीसीन पर्यटकांक कांय म्हत्वाचीं सुचोवण्यो जारी केल्यात. सोरो पियेवन घसघशाचेर भितर सरचो न्हय, धोक्याच्या उंच फातरांचेर वचून सेल्फी घेवपाचो यत्न करचो न्हय, उदकाच्या प्रवाहांत खोल वचूंक जायना, रान वाठारांत प्लास्टीक आनी कोयर उडोवंक ना, आनी रानवटी जनावरांक आनी पर्यावरणाक कसलेंच लुकसाण जावचें न्हय हाची जतनाय घेवची अशें आवाहन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
