भांगरभूंय | प्रतिनिधी
– ऑगस्ट सावन बेकायदो बोरवेली जातल्यो सील
पणजी : पावसाक कळाव जालो तरी उदकाचो उणाव जावचो न्हय म्हूण मे म्हयन्यांत धरणांनी उदक सांठोवपाची तजवीज करतले. हे खातीर खासा येवजण तयार जातली, अशें उदका पुरवण मंत्री सुभाष शिरोडकार हांणी सांगलें. तशेंच बेकायदो बोरवेलींचेर ऑगस्ट सावन कारवाय सुरू जातली, अशें तांणी सांगलें.
हे खेपे पावस उसरां सुरू जालो. हाका लागून साळावली, अंजुणें ह्या धरणां सयत सगळ्या धरणांतल्या उदकांची पातळी देंवली. पावस आयलो ना, जाल्यार उदकाचो उणाव जातलो, असो हुस्को तयार जाल्लो. आतां पावस सुरू जाल्ल्यान धरणांतल्या उदकांचें प्रमाण वाडत आसा. फुडाराक लेगीत अशी स्थिती येवप शक्य आसा. हाका लागून मे उपरांत दोन, तीन म्हयने पावतलें इतलें उदक धरणांत सांठोवन दवरपा खातीर खासा तजवीज जातली. खास येवजण तयार जातली, अशी म्हायती मंत्री शिरोडकार हांणी दिली.
चिंबलांतल्या बेकायदो बोरवेलींचेर कारवाय करपाचे आदेश उच्च न्यायालयान दिल्यात. ऑगस्ट सावन बेकायदो बोरवेली सील करपाची कारवाय सुरू जातली, अशें मंत्री शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
