भांगरभूंय | प्रतिनिधी
मडगांवः काणा बाणावली हांगा जाल्ले आंतरगांव फुटबॉल सर्तीच्या मॅची वेळार युनायटेड बॉयज ऑफ आंबावलीचो खेळगडो डायलान कार्वाल्हो हाका मरण आयिल्ल्यान गोंय फुटबॉल असोसिएशनान दुख्ख उक्तायलां. घडणुकेचें राजकारण करून आनी तथ्य समजून घेनासतना संघटणेचेर केल्ले आरोप चुकीचे आनी दिशाभूल करपी आसात अशें जीएफएन म्हणलें.
फुटबॉल सर्ती स्वतंत्र थळावे क्लब आनी आयोजक समित्यांनी घडोवन हाडटात अशें स्पश्टीकरण दितना जीएफएन सांगलें. गोंय फुटबॉल असोसिएशन फकत नेम, वेळापत्रक, रेफ्री आनी शिस्त हांचेर प्रशासकीय देखरेख दवरपा खातीर वावुरता. वेवस्थापनांत संघटणेचो थेट वांटो ना.
दर वर्सा 60 परस चड आंतरगांव सर्ती आनी संघटणेच्यो स्वताच्यो सर्ती आनी सुमार 2,300 मॅचीं वांगडा खेळटात. दरेक मॅची खातीर प्रगत जिवरक्षक प्रणाली, डिफिब्रिलेटर आनी पॅरामेडिकल कर्मचारी आशिल्ली खाजगी एम्ब्युलन्स वापरल्यार स ते आठ हजार खर्च येता आनी हो खर्च कोटी मेरेन पावतलो. थळाव्या क्लब आनी आयोजकांच्या अर्थीक क्षमते भायर हो खर्च आसा. तशेंच सरकारी अॅम्ब्युलन्स भौशीक आपत्कालीन सेवां खातीर आसतात आनी तीं फुटबॉल मॅचीं खातीर राखून दवरप वेव्हारीक रितीन शक्य ना.
खेळगड्यांचे सुरक्षे खातीर सर्ती पयलीं वैजकी चांचण्यो सक्तीच्यो केल्यात. खेळगड्यांचे सुरक्षे खातीर आपत्कालीन प्रतिसाद येवजण तयार करपाचें काम सुरू आसा. हाचे खातीर ऑगस्ट म्हयन्यांत जीएफए वैजकी समिती वरवीं क्लबाचे अधिकारी, स्वयंसेवक आनी आयोजकांक खाशेले पयली मजत आनी सीपीआर प्रशिक्षण वर्ग घडोवन हाडटले अशेंय जीएफएन सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
