भांगरभूंय | प्रतिनिधी
1 जानेवारी ते 13 जून 2026 ची आंकडेवारी
पणजी: गोंयांत रस्तो अपघातांचें सत्र सुरूच आसा. फाटल्या दोन दिसांत चार अपघातांनी चौगांक मरण आयलें. हाची दखल घेवन येरादारी विभागान केल्ल्या अपघाताची आंकडेवारीची दखल घेतली तेन्ना अंदूं 1 जानेवारी ते 13 जून 2026 ह्या 164 दिसांत 1,194 अपघात जाले. तातूंत 122 जाणांक मरण आयलें. फाटल्या वर्साची तुळा करीत जाल्यार अपघातांत 8.05 टक्के (89) वाड जाल्या. जाल्यार मरणां मदीं 3.017 टक्के (4) मरण उणें जालां. जाल्यार गंभीर जखमी आनी किरकोळ जखमी मदीं वाड जाल्या. गोंयांत दिसाक 7 अपघात आनी 32 वरांत एकल्याक मरण जायत आशिल्ल्याचें मुखार आयलां.
येरादारी विभागाच्या अपघाती आंकडेवारीची दखल घेतली तेन्ना, 2025 वर्सा वयल्या काळांत वट्ट 1,105 अपघातांची नोंद जाल्ली. जाल्यार अंदूं 2026 वर्सा 1,194 अपघात जाल्यात. हाका लागून फाटल्या वर्साचे तुळेन अंदूं वट्ट अपघातां मदीं 89ची वाड जाल्या. ही टक्केवारी 8.05 इतली आसा. जाल्यार अपघाती मरणां मदीं फाटल्या वर्साचे 126 तुळेन अंदूं 122 जाणांक मरण आयलां. ताका लागून 3.17 टक्के मरणां मदीं उणाव जाला.
मरण आयिल्ल्यांची संख्या उणी जाल्ली आसली तरी गंभीर आनी किरकोळ अपघातांनी आनी जखमीं मदीं वाड जाल्या. तेप्रमाण, अंदूं 164 दिसांत 1,194 अपघातांत 122 जाणांक अपघातांत मरण आयलां. तशेंच वयल्या काळांत 116 अपघातांनी 148 जाणांक गंभीर दुखापत जाल्या. जाल्यार 267 किरकोळ अपघातांत 420 जाणांक किरकोळ दुखापती जाल्यात. तशेंच 694 अपघातांत वाहनांचें व्हड प्रमाणांत लुकसाण जालां.
गोंयांत वयल्या काळांत 2025 वर्सा 1,105 अपघात जाल्ले. तातूंतल्या 122 भिरांकूळ अपघातांनी 126 जाणांक मरण आयिल्लें. त्या वेळार 103 अपघातांत 124 जाणांक गंभीर जाल्यार 225 अपघातांत 350 जाणांक किरकोळ दुखापती जाल्ल्यो. तशेंच 654 वाहनांचें व्हड प्रमाणांत लुकसाण जाल्लें.
वयल्या 2026त 2025चे तुळेन गोंयांत 89 अपघातां मदीं वाड जाली जाल्यार अपघाती मरणां मदीं 4 उणें जाल्ल्याचें मुखार आयलां. गोंयांत अपघात, गंभीर आनी किरकोळ अपघात वाडिल्ले आसले तरी मरण येवप्यांची संख्या उणी जाल्या.
हाची दखल घेतकूच रस्तो सुरक्षा उपाय आनी आपत्कालीन वैजकी मजतीक लागून जीव वाटावपाचें प्रमाण वाडलां आसुये. पूण, गंभीर आनी किरकोळ जखमींची संख्या वाडिल्ल्यान येरादारी नेमांचें उल्लंघन, गतीची मर्यादी आनी हॅल्मेट घालूंक नाशिल्ल्यान तशेंच सिटबेल्टाचो वापर करूंक नाशिल्ल्यान अपघातांनी वाड जायत आसा. ताका लागून वाहन चालकांनी वयल्या नेमांक पाळो दिवपाची गरज आसा.
मजगतीं, वेळावेळार पुलीस यंत्रणा नागरिकांक गतीची मर्यादा पाळप, सोरो पियेवन वाहन न चलोवप आनी सुरक्षीत वाहन चलोवपा विशीं आवाहन करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
