भांगरभूंय | प्रतिनिधी
पणजी: दर्यादेगांचेर वा हेर कडेन पेंवपाक गेल्ले वा नुस्तेमारी खातीर गेल्ल्यांक उदकांत बुडून मरण येवपाच्याे घडणुकाे दिसान दीस घडत आसात. जानेवारी सावन साडेपांच म्हयन्यांत गोंयांत 57 जाणांक बुडून मरण आयलां. हातूंत गोंया भायल्यान येवपी पर्यटक तशेंच थळाव्यांचो आस्पाव आसा.
शेनवारा वास्को हांगासरल्या 4 जाणांक कुळें न्हंयेंत बुडून मरण आयलें. हातूंत तीग जाण सक्के भाव आसात. हे दुर्घटणेक लागून वास्को शारांतूच न्हय जाल्यार पुराय गोंय दुख्खाच्या दर्यांत बुडलां. अनवळखी थळांचेर पेंवपाक वच्चें न्हय म्हूण सरकार आवाहन करीत आसता तरी लेगीत तरणाटे तशेंच पर्यटक दर्यादेगां सयत न्हंयो तशेंच गांवगिऱ्या वाठारां वेल्या उदका स्रोतांचेर पेंवपाक वचत आसात. आतां मेरेन जूनांत 8 जाणांक मरण आयलें. ताचे पयलीं मे म्हयन्यांत 5 जाल्यार एप्रीलांत 11 जाणांक मरण आयलें. ताचे पयलीं जानेवारी ते मार्च मेरेन 33 जाणांक बुडून मरण आयिल्ल्याची नोंद मेळटा.
जून म्हयन्याचो विचार करीत जाल्यार शेनवारा (13 जून) वास्कोच्या चार जाणांक बुडून मरण येवचे पयलीं 11 जूनाक सुशांत सुमेद हाका श्रीस्थळ हांगा नुस्तेमारीक गेल्लो तेन्ना बुडून मरण आयलें. हाचे आदले दिसा 10 जूनाक अमृत परवार हाका बिर्ला – झुआरीनगर हांगा पेंवता आसतना बांयंत मरण आयलें. 5 जूनाक मळा – पणजे हांगच्या एकल्याक दुचाकी वेल्यान उदकांत पडून मरण आयलें. ह्या म्हयन्याची सुरवात उदकांत जावपी दुर्घटनेंतल्यान जाली. जूनचे पयले दिसा (1 जून) सतीश भोसले (सोलापूर) ह्या पर्यटकाक कांदोळी दर्यांत बुडून मरण आयलें.
सगल्या घडणुकांनी दिसाक एकल्याकूच मरण आयलां. मात शेनवारा वास्को हांगाच्या चौगांक एकाच वेळार बुडून मरण येवपी घडणुकेक लागून गोंयांत खवदळ पडलो.
हाचे पयलीं 25 एप्रीलाक भाटपाल वज्रे न्हंयेंत बुडून ऋत्वीक नायक (11) आनी ध्रूव वडार (7) ह्या दोगां भुरग्यांक मरण आयिल्लें. हाचे पयलीं केप्यां डोशियस शॅरी आनी हरजितसिंग धून ह्या दोगांक पेंवपाक गेल्ले कडेन मरण आयिल्लें.
बांयो, कालवे, बंधारे, खारीज, दर्या तशेंच स्विमींग पुलांत लेगीत मरण आयलां. अंदूं 10 म्हयन्याच्या एका भुरग्याक बादलेच्या उदकांत बुडून मरण आयलें.
लोकांक सांगून, सांगून थकलों: मुख्यमंत्री
अनवळखी सुवातांचेर वा उदकाच्या खोलायेचो अदमास ना जाल्यार थय पेंवपा खातीर देंवचें न्हय, हे लोकांक सांगून, सांगून हांव थकलों. कितल्या सुवातांचेर सरकार राखणे वणत उबारतले वा उपाय करतलें? दर एकल्यान जतनाय घेवपाची गरज आसा. पावसांत अनवळखी घसघशे, न्हंयो वा हेर कडेन उदकांत देंवचें न्हय, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
