भांगरभूंय | प्रतिनिधी
काणकोण, पोरणें गोंय, पेडणें हांगा सरासरी परस चड पावस
पणजी: अंदूं मॉन्सूनाचें आगमन दर वर्सा प्रमाण त्याच दिसांनी जाल्लें आसलें तरी पावसाक नेट नाशिल्ल्यान दिसांन दीस तूट वाडत आसा. पावसाचें प्रमाण सरासरी परस 50 टक्के उणें आसा. पावस नाशिल्ल्यान उदकाचो उणाव निर्माण जावपाची भिरांत आसा. ते भायर पेरणी लेगीत लांबणेर पडपाची शक्यताय आसा.
1 जून ते 14 जून मेरेन सरासरी प्रमाण गोंयांत 326 मिमि पावस पडपाक जाय. मात आतां मेरेन तो 162.3 मिमि (6.38 इंच) पडला. हें प्रमाण 50 टक्के उणें आसा. 1 जून उपरांत गोंयांत अजून मेरेन एकूय दीस 1 इंचा परस चड पावसाची नोंद जावंक ना. 10 जूनाक सगल्यांत चड 24.7 मिमि पावसाची नोंद जाल्या. हो पावस लेगीत इंचा परस उणो जाता.
दर वर्सा वाळपय आनी सांखळे चड पावसाची नोंद जाता. अंदूं वाळपयच्या पावसाची आंकडेवारी हवामान खात्या कडेन उपलब्ध ना. मात दर वर्साचे तुळेन प्रमाण उणें आसा. अंदूं काणकोण आनी मुरगांवां चड पावसाची नोंद जाल्या.
काणकोणां सगल्यांत चड पावस
अंदूं काणकोणां सगल्यांत चड म्हणल्यार 392.2 मिमि (15.44 इंच) पावसाची नोंद जाल्या. हें प्रमाण सरासरी परच बरेच चड आसा. काणकोणां उपरांत मुरगांव 225.4 मिमि (8.87 इंच), पोरणे गोंय 177.6 मिमि (6.99 इंच), पेडणें 169.8 मिमि (6.68 इंच) , धारबांदोडें 152 मिमि (5.98 इंच) पावसाची नोंद जाल्या. काणकोण, पोरणे गोंय आनी पेडणें ह्या तीन सुवातांचेर सरासरी परस चड पावसाची नोंद जाल्या.
दर दिसा दनपारां वा रातीं कडेन एक दडक पडटा. पूण ती चड वेळ तिगना. दनपारां तापमान वाडून गरमी जावपाक लागता. तापमान वाडीक लागून गरमे सावन लोकांक थाकाय मेळूंक ना.
वाळपय पावसाची आंकडेवारी उपलब्ध ना
हवामान खात्या कडेन पणजी आनी मुरगांव हे दोनूच कडेन पावसाचें मेजमाप करपी यंत्रणा आसात. पेडणें, म्हापशें, वाळपय, सांखळे, पोरणें गोंय तशेंच हेर सुवातांचेर आपत्ती वेवस्थापन फांट्या वतीन पावसाची आंकडेवारी मेळटा. पणजे आनी मुरगांव सोडले जाल्यार हेर कडेन आपत्ती वेवस्थापना वतीन पावसाचें मेजमाप जाता. तेच पावसाचे आंकडे हवामान खात्याक धाडटात. वाळपयच्या पावसाची म्हायती धाडूंक नाशिल्ल्या कारणान हवामान खात्याक लेगीत वाळपयच्या पावसाची आंकडेवारी मेळना, अशें हवामान खात्याचे गोंयचे मुखेली नहुष कुलकर्णी हांणी दिली.
…………बॉक्स…………….
आतां मेरेन नोंद जाल्लो पावस
सुवात पावस (मिमि)
म्हापशें 100.2
पेडणें 169.8
पणजी 99.9
पोरणें गोंय 177.6
सांखळी 103.6
फोंडें 91.9
धारबांदोडें 152
काणकोण 392.2
दाबोळी 161
मडगांव 170.7
मुरगांव 225.4
केपें 107.4
सांगें 95.4
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
