भांगरभूंय | प्रतिनिधी
पणजी : गोंयांत मान्सून पावले उपरांत दृश्टी मरिनान थळाव्या लोकांक तशेंच पर्यटकांक दर्यांत देंवचें न्हय असो सल्लो दिवन दर्यादेगो, न्हंयो, घसघशे तशेंच हेर उदकाच्या सुवातांच्या वाठारांत खाशेली जतनाय घेवपाचो उलो मारला.
राज्य सरकार नियुक्त दृश्टी मरीन लायफसेव्हींग संस्थेन गोंयच्या 54 दर्यादेगांचेर 450 परस चड प्रशिक्षीत लायफसेव्हर्स आनी बीच मार्शल्स तैनात केल्यात. हातूंत दक्षीण गोंयच्या 30 आनी उत्तर गोंयच्या 24 दर्यादेगांचो आस्पाव आसा. हाचे भायर मयें तळें, दुदसागर घसघसो, सांगेंचो सावरी घसघसो आनी सत्तरीचो म्हवाचो गुणो हांगाय जीवरक्षक तैनात केल्यात.
मान्सून काळांत दर्या खवळिल्लो आसता आनी हवामानांत अचकीत बदल जावपाची शक्यताय आसता. देखून या काळांत दर्यांत पेंवप, वॉटर स्पोर्ट्स आनी नुस्तेमारीचेर बंदी घातल्या. दर्यांतली धोकादायक परिस्थिती लक्षांत दवरून, थळाव्या लोकांक आनी पर्यटकांक शिटूक करपा खातीर गोंयांतल्या सगल्या दर्यादेगांचेर तांबडे बावटे लायल्यात.
“मान्सून काळांत दर्या वयर- वयर शांत दिसलो तरी कांय खिणांनीच तो सामको धोकादायक जावपाक शकता. खर प्रवाह, व्हड ओसाडी आनी सतत बदलपी हवामान हाका लागून सादें उथळ उदक लेगीत जीवघेणें थारूंक शकता. देखून सगल्या लोकांनी आनी पर्यटकांनी तांबड्या बावट्यांची शिटकावणी गांभिर्यान घेवची आनी दर्यांत देंवप टाळचें, असो उलो दृश्टीन मारला. तशेंच दर्यादेगे वयले खडपाळ वाठार, तळप आनी दोंगर कडेर खाशेली जतनाय घेवपाचो सल्लो दिला. पावसाक लागून ह्या वाठारांत निसरट तयार जातात आनी निसरून दुखापत जावपाचो धोको वाडटा. तशेंच दर्यांतल्या उथळ उदकांत लेगीत वच्चें न्हय अशी शिटकावणी दिवन सांगलां, खर प्रवाह आनी व्हड ओसाडी मनशाक खिणा भितर खोल उदकांत ओडून व्हरपाक शकतात.
दर्यादेगेक भेट दितना उदकाचे रेशे पसून उण्यांत उणें 10 मिटर अंतर दवरचें आनी जीवरक्षकांच्या सुचोवण्यांचें पालन करचें. दर्यादेगांचेर भुरग्यांचेर सतत नदर दवरची. उदक कितलेंय उथळ आसलें तरी भुरग्यांक एकट्याक उदकांत वचूंक दिवचें न्हय. दर्यादेगां वांगडाच फातराळ वाठारां सावन पयस रावचें, कारण पावसाक लागून निसरट तयार जाता. दर्यादेगे वयल्या फातरांचेर उबे रावन सेल्फी घेवप टाळचें. जीवरक्षक गस्त घालतना जिपी वयल्या भोशीक आवाज प्रणाली वरवीं सुचोवण्यो आनी चत्राय दितात. देखून शिटूक रावन त्या सुचोवण्यां कडेन लक्ष दिवचें. जोगलां मारतना आनी गडगड सुरू आसतना दर्यादेगेचेर वचप वा उदकांत देंवप टाळचें, कारण जोगलां पडपाचो धोको आसता, अशें दृश्टीन म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
