चार अपघात: चाैगांक मरण

भांगरभूंय | प्रतिनिधी

धारबांदोड्यां आनी अनमोड घांटार मेळून दोगांक मरण

कुंकळ्ळे आपअपघातांत तरणाट्याक मरण

सावतावाडो- बागा हांगा पुलीस कॉन्स्टेबलाक मरण

फोंडें, मडगांव, म्हापशें: धारबांदोडें म्हालांत आयतारा जाल्ल्या दोन वेगळ्या वेगळ्या अपघातांनी दोगांक मरण जाल्यार एक तरणाटो गंभीर जखमी जालो. अनमोड घांटार ट्रक देगणांत पडून सुदीप कापोझ (अस्तंत बंगाल) ह्या ट्रक ड्रायव्हराक मरण आयलें. जाल्यार धारबांदोड्यां दोन मोटारसायकली मदीं एकामेका सामकार अपघात जाल्ल्यान विजय चव्हाण (69, पणसुलें- धारबांदोडें) हांकां मरण आयलें. ह्या अपघातांत दुचाकी चालक निखील नायक (डोंगरी) हो गंभीर जखमी जालो.

अंकोला सावन धर्मीक दर्शन घेवन मडगांवां परतून येता आसतना कुंकळ्ळी पुलीस स्टेशना कुशीक जाल्ल्या आपअपघातांत मडगांवच्या अजय पांढरेकार (31, रा. मालभाट) ह्या तरणाट्याक मरण आयलें.

सावतावाडो, बागा हांगा गतीन आयिल्ले आयट्वेन्टी मोटारीन स्कुटरीक चुकीचे दिशेन वचून धपको दिवन फरपटत व्हेल्ल्यान जाल्ल्या अपघातांत पुलीस कॉन्स्टेबल केतन गावडे (28, रा. कुमारजुंवें) हाका मरण आयलें.

धारबांदोड्यां चैतन्य पेत्रोल पंपा मुखा वेल्या राष्ट्रीय म्हामार्गार काल (आयतारा) सकाळीं 9.30 वरांच्या सुमाराक स्कुटर आनी दुचाकी हांचो एकामेकाक मुखा वेल्यान धपको बसलो. ह्या अपघातांत जखमी जाल्ले विजय चव्हाण हांकां पिळयां मुळाव्या भलायकी केंद्रांत दाखल केलो. पूण उपचार सुरू आसतना तांकां मरण आयलें. जाल्यार अपघातांतलो दुसरो जखमी निखील नायक हो गंभीर जखमी जालो. पुलिसांनी दिल्ले म्हायती प्रमाण जीए 12 बी 1049 क्रमांकाची स्कुटर घेवन विजय चव्हाण धारबांदोड्यां दूद हाडपा खातीर गेल्लो. दूद घेवन परतून येतना तांणी पेत्रोल घालपा खातीर स्कुटर उजवे वटेन वळयली. त्याच वेळार मुखार सावन येवपी जीए 07 एएम 1472 क्रमांकाचे दुचाकीचो धपको स्कुटरीक बसलो. हातूंत दोगूय चालक रस्त्यार पडून जखमी जाले. जखमींक 108 एम्बुलन्सींतल्यान पिळयां मुळाव्या भलायकी केंद्रांत दाखल केले. गंभीर जखमी जाल्ले विजय चव्हाण हांकां उपचार सुरू आसतना मरण आयलें. फोंडें पुलीस स्टेशनाचे उपनिरिक्षक अंजली धुळापकार, आशीश वेळीप, सहाय्यक पुलीस उपनिरिक्षक रोहिदास भोमकार आनी हेर पुलीस कर्मचाऱ्यांनी घडणूक थळार वचून पंचनामो केलो.

मजगतीं, आयतारा सकाळीं पुलिसांचें ‘रोबर्ट’ वाहन अनमोड घांटार गस्त (पेट्रोलींग) घालीत आसतना तांकां देगणांत ट्रक पडिल्ल्याचें दिसून आयलें. पुलिसांनी बेगोबेग सकयल वचून पळयलें तेन्ना ड्रायव्हर मरण आयिल्ले अवस्थेंत सांपडलो. सुदीप कापोझ (रा. अस्तंत बंगाल) अशें ह्या मरण आयिल्ल्या ड्रायव्हराचें नांव आसा. मुळावे म्हायत प्रमाण, हो अपघात शेनवारा, 13 जूनाक रातचो घडलो. पुलिसांनी हे घडणुकेची म्हायती रोखडीच फोंडेंच्या उजो पालोवपी दळाच्या कर्मचाऱ्यांक दिली. दळाच्या कर्मचाऱ्यांनी घडणूक थळार धांव घेवन कूड भायर काडली. निरिक्षक राघोबा कामत हांच्या मार्गदर्शना खाला अपघाताचो पंचनामो केलो.

दुसरे एके घडणुकेंत अजय पांढरेकार हो आपल्या दोन इश्टां सयत खाजगी मोटारीन कर्नाटकांतल्या अंकोला हांगा देवदर्शना खातीर गेल्लो. दर्शन घेवन मडगांवचे दिशेन परतून येता आसतना, कुंकळ्ळी पुलीस स्टेशन वाठारांत ताचें वाहना वेलें नियंत्रण सुटलें आनी ताचे मोटारीन फुटपाथाक वचून धपको दिलो. ह्या अपघातांत चालक अजय पांढरेकार हाका गंभीर दुखापत जाली. अपघाता उपरांत अजय आनी ताच्या इश्टांक मुळाव्या उपचारा खातीर बाळ्ळे मुळाव्या भलायकी केंद्रांत दाखल केल्ले. उपरांत फुडल्या उपचारा खातीर ताका दक्षीण गोंय जिल्हो हॉस्पिटलांत व्हेलो. पूण थंय ताची भलायकी थीर नाशिल्ल्यान बांबोळे गोंय वैजकी म्हाविद्यालयाच्या हॉस्पिटलांत उपचारा खातीर दाखल केलो. पूण उपचारा वेळार ताका मरण आयलें.

कुंकळ्ळे पुलिसांनी ह्या प्रकरणाची असैमीक मरण म्हूण नोंद केल्या. कूड मरणा उपरांतचे तपासणे खातीर गोमॅकाँत दवरल्या. कुंकळ्ळी पुलीस उपनिरिक्षक आदित्य सावंत ह्या प्रकरणाचो फुडलो तपास करतात.

तिसरे एके घडणुकेंत सावतावाडो बागा हांगा गतीन येवपी आयट्वेन्टी मोटारीन स्कुटरीक चुकीचे दिशेन वचून धपको दिल्ल्यान केतन गावडे हाका मरण आयलें. पर्यटन विभागा कडेन संलग्न आशिल्लो मयत कॉन्स्टेबल आपली ड्युटी सोंपोवन घरा वता आसतना काळान ताचेर घालो घालो. अपघाता उपरांत पळ काडिल्ल्या साजीद शेख (रा. कोल्हापूर) हाचो सोद कळंगूट पुलीस घेतात. हो अपघात आयतारा फांतोडेर 4.11 वरांच्या सुमाराक सावतावाडो हांगासरल्या कँडेलारिया कपेला कुशीक घडलो. मयत पुलीस कॉन्स्टेबल केतन गावडे कांदोळे दर्यादेगेर आपली ड्युटी सोंपोवन जीए 05 एच 3002 क्रमांकाचे अ‍ॅक्टिवा स्कुटरीन कळंगूटे सावन बागाचे दिशेन वतालो. जाल्यार एमएच 02 सीडी 5966 क्रमांकाची आयट्वेन्टी मोटार घेवन दुबावीत आरोपी सादीक शेख हो बागा सावन कळंगूटचे दिशेन वतालो.

घडणूक थळार गतीन आयिल्ले मोटारी वेल्या दुबाविताचें नियंत्रण सुटलें आनी दुचाकीचे दिशेन वचून मुखा वेल्यान येवपी दुचाकीक मोटारीन नेटाचो धपको दिलो. धपको बसले उपरांत मोटारीन सुमार 50 मिटर दुचाकी सयत मयत दुचाकी चालकाक फरफटत व्हेलो आनी उपरांत रस्त्याचे कुशीक आशिल्ल्या लायटीच्या खांब्यांक दोनूय वाहनां धडकली.

ह्या अपघातांत मयत पुलीस कॉन्स्टेबल हो गंभीर जखमी जालो. जखमीक एम्बुलन्सींतल्यान सुरवेक म्हापशेंच्या जिल्हो हॉस्पिटलांत दाखल केलो. थंय सावन ताका फुडल्या उपचारा खातीर बांबोळे गोंय वैजकी हॉस्पिटलांत धाडून दिलो. थंय ताचेर उपचार सुरू आसतना काल सकाळीं ताका मरण आयलें.

घडणुकेची म्हायती मेळटकूच कळंगूट पुलीस सहाय्यक उपनिरिक्षक नरेशकुमार साळगांवकार हांणी वांगड्यां सयत घडणूक थळार धांव घेतली आनी पंचनामो केलो. ह्या प्रकरणांत पुलिसांनी दुबावीत मोटार चालका आड सदोश मनीसवधाचो गुन्यांव दाखल केलो. फुडलो तपास पुलीस उपनिरिक्षक विश्वजीत ढवळीकार करतात.

मजगतीं, पळ काडिल्ल्या दुबावीत मोटार चालकाचो सोद पुलीस घेतात. काल सांजवेळा उसरां मेरेन दुबावीत पुलिसांक सांपडूंक नाशिल्लो. पुलिसांनी दुबाविताच्या इश्ट, इश्टिणीक ताब्यांत घेतल्यात, आनी तांची चवकशी सुरू आसा.