म्हजे खातीर जनता देवाचें मूर्त रूप

भांगरभूंय | प्रतिनिधी

नवी दिल्ली :  इतलो तेंप भारत मातेची सेवा करपाचो मान मेळप हें देवाच्या खाशेल्या कृपेक लागून शक्य आसा. आनी म्हजे खातीर जनता देवाचें मूर्त रूप आसा, अशें प्रधानमंत्री नरेंद्र मोदी हांणी म्हणलें. नरेंद्र मोदी हांणी सेगीत 12 वर्सां प्रधानमंत्री म्हूण जनसेवा करपाचो इतिहास रचलो. देशाचे पयले प्रधानमंत्री पं. जवाहरलाल नेहरू हांचो विक्रम हांचो सगळ्यांत चड तेंप ह्या पदार रावपाचो विक्रम मोडलो. हे निमतान नवी दिल्लींत भारत मंडपमांत एनडीए सरकारा वतीन खाशेली परिशद जाली. ते वेळार आयोजीत परिशदेंत ते उलयताले.
26 मे 2014 दिसा प्रधानमंत्री म्हूण जबाबदारी सांबाळ्ळ्या उपरांत नरेंद्र मोदी हांणी वेंचून आयिल्ल्या सरकाराचो मुखेली म्हूण नेहरूंचो विक्रम मोडलो. प्रधानमंत्री म्हूण ते 4,399 दीस जनसेवा करतात. जवाहरलाल नेहरू हांणी 4398 दीस प्रधानमंत्रीपद सांबाळ्ळां.
एनडीए सरकारान 12 वर्सां पुराय जातकच देशांतल्यान आनी संवसारभरांतल्यान सरकाराक तशेंच प्रधानमंत्र्यांक परबीचें संदेश आयले.
2014 वर्सा जेन्ना एनडीए जिखलो तेन्ना ती एका नव्या आशेची सकाळ आशिल्ली. आमचे कडेन एक व्हड जापसालदारकी आशिल्ली, काँग्रेसीच्या विश्वासघातांतल्यान लोक सावरताले, सगळ्यांनी आमचेर विस्वास दवरून आमकां जनसेवेची संद दिल्ली. तांणी दवरिल्ल्या विस्वासाचो आमकां आदर करचो पडटलो. आमी लोकांचो विस्वास कायम दवरपाक काम करता, करपाक जाय, अशेंय प्रधानमंत्र्यान म्हणलें.
आमी नव्या नव-मध्यमवर्गाक निराश करचे ना. देशाक आमचे कडल्यान खूब अपेक्षा आसात, आमी तांच्या अपेक्षांचो आदर करपाक जाय.
विकसीत भारताक लागून पक्षांचे लक्ष्य, राजकारण बदल्लां. विकसीत भारत हें; आतां सगळ्यांचें लक्ष्य जालां, अशेंय तांणी म्हणलें.
काँग्रेसीन देशाक अशें जाणवून दिल्लें की काम ल्हव ल्हव वाडटलें, भारत हो वेगवान देश न्हय. काँग्रेसीच्या काळांत प्रकल्प ठप्प जाल्लें, एनडीएच्या काळांत प्रकल्प वेळार पूर्ण जाले. भारतीय आयात केल्ले मोबायल विकत घेताले, आतां आमी भारतांत फोन तयार करतात. 2014 उपरांत डिजिटल वेव्हारांत व्हड वाड जाल्या. आयज भारत डिजिटल मळार खूब मुखार आसा, अशेंय तांणी म्हणलें.
ह्या वेळार एनडीए कुटुंबान आयजचो दीस व्हड दबाजान मनोवपाचो थाराव मांडलो. ही तुमची उदारता. कारण ह्या प्रवासाक हांव वैयक्तीक यश मानना, दरेक नदरेंतल्यान ही एक सामुहीक उपलब्धी आसा, तशेंच एनडीए पक्षांची लेगीत ही एक सामुहीक उपलब्धी आसा. देखून हांव हें एनडीए पक्षांच्या कार्यकर्त्यांक ओंपतां, अशेंय प्रधानमंत्री नरेंद्र मोदी हांणी म्हणलें.

केंद्रीय मंत्रीमंडळान मान्यताय दिल्लो प्रस्ताव

ह्या इतिहासीक दिसा निमतान केंद्रीय मंत्रीमंडळान प्रधानमंत्री नरेंद्र मोदी हांकां मनापसून परबीं दिली. गरिबांच्या कल्याणा खातीर आनी उपेक्षीत घटकांच्या सबलीकरणा खातीर प्रधानमंत्र्याच्या फुडारपणा खाला केल्ल्या वावरा खातीर मंत्रीमंडळान उपकार मानले.  
देशांतल्या 25 कोटी परस चड नागरिकांक गरिबीचेर येसस्वीपणान जैत मेळचें हे खातीर प्रधानमंत्र्याच्या फुडारपणा खाला चालीक लायिल्ल्या धोरणांची मंत्रीमंडळान तोखणाय केली.  
देशाचे सेवे खातीर प्रधानमंत्र्यान दाखयिल्ल्या अनोख्या समर्पण आनी अथक प्रयत्नां खातीर मंत्रीमंडळान तांचे उपकार मानले.  
सर्वसमावेशक उदरगत आनी समाजीक न्याय हे बाबतींत प्रधानमंत्र्यान केल्ल्या यत्नांची मंत्रीमंडळान तोखणाय केल्या.  
राष्ट्रीय सुरक्षा घटमूट करपा खातीर आनी देशाच्या हिताची राखण करपा खातीर प्रधानमंत्र्यान दाखयिल्ल्या फुडारपणाचोय मंत्रीमंडळान उल्लेख केलो.
विकसीत भारत घडोवपा खातीर प्रधानमंत्र्याच्या दूरदर्शी संकल्पाक आनी फुडारपणाक मंत्रीमंडळान पुराय तेंको दिलो. प्रधानमंत्र्याच्या बऱ्या भलायकेची आनी दीर्घायुषी जावची अशी सदिच्छा दितना मंत्रीमंडळान मंजूर केल्लो प्रस्ताव मान्य केल्ल्याची म्हायती दिली. नरेंद्र मोदी हांच्या फुडारपणा खाला भारत एक आत्मनिर्भर, सुरक्षीत, समृध्द आनी वैभवशाली राष्ट्र म्हूण नव्या उंचायेचेर पावतलो आनी 2047 मेरेन एक विकसीत राष्ट्र जावपाचो मार्ग सातत्यान सुकर करतलो असो विस्वास मंत्रीमंडळान उक्तायलो.