भांगरभूंय | प्रतिनिधी
मडगांव : गोंयांत पर्यटना खातीर आयिल्ल्या केरळांतल्या पर्यटकांच्या एका गटाक जेवणांतल्यान विखबाधा (फूड पॉयजनीग) जाल्ल्यान दक्षीण गोंय जिल्लो हॉस्पिटलांत दाखल केल्ले. उपचारा उपरांत सगल्यांची भलायकी सुदारिल्ल्यान तांकां डिस्चार्ज दिलो.
ही घडणूक ९ जुनाक रातची उसरां घडली. दक्षीण गोंय जिल्लो हॉस्पिटलाचे अधीक्षक डॉ. राजेंद्र बोरकार हांणी दिल्ले म्हायती उपरांत, हे पर्यटक दोन बसींतल्यान प्रवास करताले. ते पोरणें गोंयां जेविल्ले. उपरांत फुडल्या प्रवासाक सुरवात केली तेन्ना रातच्या सुमार पावणे इकरा वरांचेर तांकां पोटान धवळपाक लागलें आनी ओंकार्यो येवपाक लागल्यो. हाका लागून तांकां रोखडेच मडगांवच्या जिल्लो हॉस्पिटलांत हाडले. रातच्या देड वरां मेरेन दुयेतींक दाखल करून घेवपाचें काम सुरू आशिल्लें.
उपचार घेतिल्ल्या २८ मदल्या २५ पर्यटकांची भलायकी सुदारिल्ल्यान तांकां बेगोबेग डिस्चार्ज दिलो. उरिल्लो दोन बायलो आनी एका चल्याक दोतोरांनी अंडर ऑब्जर्वेशनाक रावपाचो सल्लो दिल्लो. मात दुसर्या राज्यांत वचपाचें आशिल्ल्यान तांणी स्वताचे जापसालदारीचेर रातच्या अडेज वरांचेर जिस्चार्ज घेतलो. खंयच्याच पर्यटकाची भलायकी चिंता करपा सारकी नाशिल्ली, अशें हॉस्पिटला वतीन स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
