भांगरभूंय | प्रतिनिधी
पणजी : आयआयटी मद्रास कला अकादमीची परतून पळोवणी करून दुरुस्तीचो एस्टीमेट सरकाराक सादर करतली. स्ट्रक्चरल दुरुस्ती कामा खातीर आयआयटी मद्रासची नेमणूक जाल्या, अशी म्हायती भौशीक बांदकाम खात्या कडल्यान मेळ्ळी. एस्टीमेट सादर जाल्या उपरांत भौशीक बांदकाम खात्या वरवीं कामाची निविदा जारी जातली.
अकादमीच्या नुतनीकरणांत 18 वाठारांत व्हड दोश आशिल्ल्याचे सिद्द जाल्ल्यान तिची परतून दुरुस्ती जातली. दुरुस्ती खातीर कला अकादमी 1 ऑगस्ट सावन परतून बंद जातली. सरकारान नेमणूक केल्ल्या कृती पंगडान हो निर्णय घेतला.
पयलीच्या कंत्राटदारांनी जी कामां केल्या, तातूत दोश आसले जाल्यार लायबीलीटी पिरीयडा खाला त्या कंत्राटदारा कडल्यान खर्च वसुल करतले. दुसरे दोश आसा, ते पयस करपा खातीर निविदा जारी जातली.
आयआयटी मद्रास आनी चार्ल्स कुरैया फावंडेशनाच्या मार्गदर्शना खाला भौशीक बांदकाम खातें दुरुस्तीचें काम करतलें. दीनानाथ मंगेशकार सभाघराची दुरुस्ती पयल्या पांवड्यार जातली. उक्त्या नाट्यघराच्या दुरूस्ती विशीं अजून निर्णय जावंक ना. कला अकादमीच्या दुरूस्ती उपरांत आयआयटी मद्रास संस्थेन पळोवणी करून मुळावो अहवाल सादर केला. ह्या अहवालांत किते दोश आसा, तांचो आस्पाव आसा. कितें आनी कशे प्रकारे दुरुस्ती करची पडटली, ताचो आस्पाव ना. हाचे खातीर परत एस्टीमेट सादर करचो पडटलो.
साऊंड, लायटींग हाचे खातीर वेगळे सल्लागार आसतले. कला अकादमी बंद दवरून 80 कोटी रूपया खर्च करून दुरूस्ती तशेंच नुतनीकरण केल्ले. 80 कोटींतले चडशे पयशे कंत्राटदाराक फारीक जाल्या. जे पयशें फारीक जावपाचे आसा, ते आता फारीक जावपाचे ना. दुरूस्ती कामाचो खर्च कंत्राटदारा कडल्यान वसूल करचो, अशें कृती दळान म्हणला. कला अकादमी बंद आसली तरी संगीत तशेंच हेर वर्ग सुरू दवरपाक हरकत ना.
तशेच कामा खातीर कला अकादमी कितलो तेप बंद दवरची पडात, ते लेगीत आताच सांगप शक्य जावचे ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
