भांगरभूंय | प्रतिनिधी
मुख्यमंत्र्यांनी घेतली केंद्रीय घर निर्माण तशेंच खण मंत्र्यांची भेट
पणजी : राज्यांतल्या शार उदरगत तशेंच घरनिर्माणा संबंदी प्रकल्पांक निधी दिवन केंद्रान सहकार्य करचें, अशी मागणी मुख्यमंत्री डॉ. प्रमोद सावंत हांणी केंद्रीय घरनिर्माण तशेंच ऊर्जा मंत्री मनोहरलाल खट्टर हांचे कडेन केली. केंद्रीय कोळसो आनी खण मंत्री किशन रेड्डी गंगापुरम हांची भेट घेवन खण वेवसायाचेर चर्चा केली.
मुख्यमंत्री डॉ. प्रमोद सावंत हे दिल्ली आसात. बुधवारा केंद्रीय मंत्र्यांची भेट घेवपा सयत एनडीएच्या परिशदेक तांणी हाजेरी लायली. आयज निती आयोगाच्या बसकेक ते हाजीर रावतले.
एनडीएच्या परिशदे पयलीं मुख्यमंत्र्यांनी केंद्रीय घर निर्माण आनी ऊर्जा मंत्री मनोहरलाल खट्टर हांची भेट घेतली. अर्बन चॅलेंज फंड येवजणे खाला गोंय सरकारान केंद्रा कडेन प्रस्ताव सादर केल्या. ह्या प्रस्तावांक मान्यताय दिवपाची मागणी केली. अर्बन चॅलेंज निधी खाला देशांत 1 लाख कोटी रूपया खर्चाच्या प्रकल्पांची कामां घेवपाची तजवीज आसा. शारांत मुळाव्याे सुविधा तयार करपा खातीर ही येवजण आसा. गोंयांत वीज वितरण करपी तरेकवार प्रकल्पांची कामां सुरू आसा. ह्या कामांचो नियाळ लेगीत बसकेत घेतलो.
उपरांत मुख्यमंत्र्यांनी केंद्रीय कोळसो आनी खण मंत्री किशन रेड्डी गंगापुरम हांची भेट घेतली. गोंयांत आतां खण वेवसाय सुरू जावपाक लागला. खण वेवसायांतल्या सुदारणांचेर चर्चा जाली, अशी म्हायती मुख्यमंत्री डॉ. प्रमोद सावंत हांणी दिली. आयज हेर केंद्रीय मंत्र्यांच्यो लेगीत भेटी मुख्यमंत्री घेतले.
हालीच्या दिसांतली मुख्यमंत्र्यांची ही सेगीत चौथी दिल्ली भेट आसा. 27 मेक प्रधानमंत्री नरेंद्र मोदी हांची कुटुंबा सयत तांणी दिल्ली भेट घेतली. प्रधानमंत्र्यां सयत तांणी केंद्रीय मजुर मंत्री मनसुख मांडविया आनी न्हंय येरादारी मंत्री सर्बानंद सोनाेवाल हांची भेट घेवन तरेकवार विशयांचेर चर्चा केली. कॅप्टन ऑफ पोर्ट इमारतीच्या उक्तावणा खातीर मुख्यमंत्र्यांनी सोनोवाल हांका निमंत्रीत केल्ले. कॅप्टन ऑफ पोर्ट इमारतीचें उक्तावण आतां फुडें धुकल्ला. उपरांत दिल्लींत मुख्यमंत्र्यांनी केंद्रीय पर्यावरण मंत्री भूपेंद्र यादव आनी केंद्रीय जलशक्ती मंत्री सी. आर. पाटील हांची तांणी भेट घेतली. हाचे उपरांत एसटी आरक्षणा विशीं केंद्रीय गृहमंत्री अमीत शाह हांची भेट घेतली. शिक्षण मंत्री धर्मेंद्र प्रधान हांचे कडेन तांणी एनआयटीच्या भरतीत गोंयकारांक प्राधान्य दिवपाची मागणी केली. आतां दोन दिसा उपरांत एनडीए आनी निती आयोगाच्या बसके खातीर ते दिल्ली आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
