भांगरभूंय | प्रतिनिधी
कोलवा पुलिसांनी केली तिगांक अटक
मडगांव : केळशी वाठारांतल्या मोबोर दर्यादेगेर शशी लाक्रा (२७) ह्या तरणाट्याचो धारेच्या शस्त्रान खून केलो. ह्या प्रकरणांत कोलवा पुलिसांनी दुबावीत संजय मांझी, आशिष कुमार आनी जगनंदन सिदार ह्या तीन दुबावितांक ताब्यांत घेवन अटक केली.
मोबोर दर्यादेग वाठारांत द बायके हेरिटेज ओल्ड अँक रिसॉर्ट लानसार खून जाल्ल्याची म्हायती कोलवा पुलिसांक मेळ्ळी. ते प्रमाण कोलवा पुलिसांनी घडणुके सुवातेर धांव घेतली. थंय शशी लाक्रा हाची कूड सांपडली.
दुबावितांनी लाक्राचेर धारेच्या शस्त्रान हल्लो केल्लो. मानेर खोल जखम जाल्ल्यान ताका जाग्यारूच मरण आयलें. पुलिसांनी ताची कूड पोस्टमार्टमा खातीर दक्षीण गोंय जिल्लो हॉस्पिटलांत धाडल्या. ह्या प्रकरणांत पुलिसांनी खुनाचो गुन्यांव नोंद केलो. पुलिसांनी दुबावीत संजय जोगेश्वर मांझी (३०, रा. रायगड, छत्तीसगड), आशिष कुमार (१८, रा. जशपूर, छत्तीसगड) आनी जगनंदन दुलारसाई सिदार (२२, रा. सध्या बेतूल, मूळ छत्तीसगड) हांकाञ ताब्यान घेवन अटक केली. शशी लाक्रा हाच्या खुनाची घडणूक २३ मेक रातच्या मोबोर हांगच्या द बायके हेरिटेज ह्या रिसॉर्ट लागसार घडली. हे घडणुकेची कागाय मरण आयिल्ले शशी हांचो भाव रोशन राम लाक्रा हांणी दिले उपरांत कोलवा पुलिसांनी खुनाचो गुन्यांव दाखल केला. दुबावीत तशेंच शशी हो नुस्तेंमारी बोटीचेर काम करपी कामगार. सोर्याचे घुवळेंत वाद जाल्ल्यान तांचे कडेन हो खून जाला, अशें आतां मेरेनच्या मुळाव्या तपासांत पुलिसांक समजलें. ह्या प्रकरणांत फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
