भांगरभूंय | प्रतिनिधी
केंद्रीय वीज प्राधिकरणान दवरला वीज दरवाडीचो प्रस्ताव
पणजी: पेत्रोल, डिझला उपरांत आतां विजेची दर वाडपाची शक्यताय आसा. केंद्रीय वीज प्राधिकरणान (सीईए) विजेची कायमस्वरुपी दर (फिक्सड चार्जेस) वाडोपाची शिफारस केल्या. हाका लागून जनतेक वीज बिलाचो शॉक बसपाची भिरांत आसा. विजेची दर वाडोवपाचो प्रस्ताव जोड वीज नियमन आयोगाक सादर करचो पडटा. सुनावणी तशेंच हेर सोपस्कार पुराय जाले उपरांत वीज दरवाड जाता. सध्या तरी वीज दरवाड जावची ना, अशें मुखेल वीज अभियंते स्टिफन फर्नांडीस हांणी स्पश्ट केलां.
वीज वितरण कंपनींचो खर्च वाडत आसा. हाचेर उपाय म्हूण विजेची दर वाडोवपाचो प्रस्ताव आसा. वीज बिलांत फिक्सड चार्जेस, एनर्जी चार्जेस, मिटर चार्जेस, एफपीपीसीए चार्जेस अशें प्रकार आसतात. फिस्कड चार्जेस वाडोवपाची शिफारस केंद्रीय वीज प्राधिकरणान केल्या. हाका लागून घरगुती, शेती, वेवसायीक अशा सगल्या प्रकारच्या विजेची दर वाडपाची शक्यताय आसा. वीज वितरण यंत्रणा, ग्रीड तशेंच मुळाव्या सुविधांचो खर्च वाडत आसा. हाचो भार कंपनींक सोंसचो पडटा. वीज वितरण कंपनींक थाकाय दिवपा खातीर फिक्सड चार्जेस वाडोवपाची शिफारस आसा. हाका लागून विजेचो वापर उणो जालो तरी बील वाडीव येतलें.
मोठमोठ्यो कंपनीं, इमारती आतां रूफ टॉफ सोलरचो वापर करपाक लागल्यात. हाका लागून विजेचो वापर उणो जावपाक लागला आनी वीज खात्याची येणावळ उणी जावपाक लागल्या. मुळाव्यो सुविधा उबारपा खातीर मात खर्च तितलोच आसता. हाचेर उपाय म्हूण फिक्सड चार्जेस वाडोवपाची शिफारस आसा.
राज्यांत फाटल्या वर्सा वीज दरवाड जाल्या. तशेंच स्मार्ट मिटर बसोवपाच्या प्रस्तावाक विरोध सुरू आसा. वीज खात्याच्या मुखेल अभियंत्यांनी मात वीज दरवाडीची शक्यताय न्हयकारल्या. वीज दरवाडीची याचिका जोड वीज नियमन आयोगा (जेईआरसी) मुखार सादर करची पडटा. याचिकेक मान्यताय मेळ्ळे उपरांतूच वीज दरवाड लागू जाता. ताचे पयलीं जायना, अशें मुखेल वीज अभियंते स्टिफन फर्नांडीस हांणी सांगलें.
पेत्रोल, डिझलाची दर वाडिल्ल्यान आतां हेर वस्तूंची दर वाडपाक लागल्या. वीज दरवाड जाली जाल्यार म्हारगाय आनीक वाडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
