भांगरभूंय | प्रतिनिधी
4 जाणांक मरण; एका भारतीयाचो आस्पाव
मॉस्को: रशिया आनी युक्रेन हांचे मदलें झूज दिसानदीस खर जायत चल्लां. काल (आयतारा) युक्रेनान रशियाची राजधानी मॉस्कोक लक्ष्य करून आतां मेरेनचो सगल्यांत मोटो ड्रोन हल्लो केलो. ह्या भिरांकूळ हल्ल्यांत एका भारतीय नागरिका सयत चार जाणांक मरण आयलां. जाल्यार तीन भारतीय नागरीक गंभीर जखमी जाल्यात. रशियातल्या भारतीय दुतावासान हे खबरेक अधिकृत दुजारो दिला.
मॉस्को वाठारांत जाल्ल्या ड्रोन हल्ल्यांत एका भारतीय नागरिकाक मरण आयलां आसून तीग जाण जखमी जाल्यात. अधिकाऱ्यांनी रोखडीच घडणूक थळाक आनी हॉस्पिटलाक भेट दिवन जखमींची विचारपूस केली, अशी म्हायती रशियातल्या भारतीय दुतावासान दिली. तशेंच मरण आनी जखमी जाल्ल्या भारतीय नागरिकांची वळख अजून पटिल्ली ना. दुतावास सद्या रशियन प्रशासन आनी संबंदीत कंपनीच्या वेवस्थापना कडेन संपर्क सादून पिडितांक गरजेची ती सगली मजत पुरयतात अशें दुतावासान स्पश्ट केलां.
थळाव्या रशियन प्रशासनान दिल्ले म्हायती प्रमाण युक्रेनाच्या ह्या ड्रोन हल्ल्यांत वट्ट चार जाणांक मरण आयलां, आनी डझना परस चड लोक जखमी जाल्यात. मॉस्कोच्या वायव्ये कडल्या खिम्की वाठारांत एका निवासी घराचेर ड्रोन कोसळिल्ल्यान एके बायलेक मरण आयलां.
मॉस्को सावन फक्त 10 किलोमिटर अंतराचेर आशिल्ल्या पोगोरेल्की ह्या गांवांत दोगां दादल्यांक मरण आयलां. युक्रेनाचे शिमे लागीं आशिल्ल्या बेळगोरोड ह्या वाठारांत एका मनशाक आपलो जीव व्हगडावचो पडलो. ह्या हल्ल्याक लागून मॉस्कोतल्या खूबशा इमारतींचें आनी मुळाव्या सुविधांचें व्हड प्रमाणांत लुकसाण जालां. रशियेच्या सगल्यांत व्हड विमानतळा कुशीक लेगीत ड्रोनाचे अवशेश विखुरिल्ल्याचें पळोवंक मेळ्ळें.
आमची ड्रोन युक्रेनाच्या शिमे पसून सुमार 500 किलोमिटराचें अंतर हुपून रशियेंत घुसली. मॉस्को भोंवतणी आशिल्ली रशियाची बळिश्ट हवाई संरक्षण यंत्रणा मोडून काडपाक आमकां येस आयलें, अशें युक्रेनाचे राष्ट्राध्यक्ष वोलोडिमीर जेलेन्स्की हांणी म्हणलें. तशेंच रशिया जें झूज लांबयत आसा आनी आमच्या शारांचेर हल्ले करीत आसा ताका आमचें हे चोख आनी न्याय्य उत्तर आसा. युक्रेनाची लांब पल्ल्याचीं अस्त्रां आतां मॉस्को मेरेन पावूंक शकतात. ही रशिये खातीर शिटकावणी आसा की तांणी हें झूज जाता तितले बेगीन थांबांवचें अशेंय जेलेन्स्की हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
