विरेश बोरकारा विशीं आरजीचो आयज निर्णय

भांगरभूंय | प्रतिनिधी

कारणां दाखय नोटिशी उपरांत पक्षाची आयज विरेशा सयत बसका

आरजी पक्ष बरखास्त जावचो ना

आरजी 2027ची वेंचणूक लडयतलो

विरेश – मनोजा मदले मतभेद उक्तडार

पणजी : पक्ष विरोधी कारवायां खातीर आमदार विरेश बोरकार हांकां कारणां दाखय नोटीस जारी केले उपरांत आरजीन तांचे कडेन आयज सांजे बसका दवरल्या. पक्षाचे मुखेली मनोज परब आनी हेर पदाधिकारी आमदार विरेश बोरकार हांचे कडेन स्पश्टीकरण तशेंच हेर गजालींचेर चर्चा करतले. आमदार विरेश बोरकार हे बसकेक वतले काय ना, हे विशीं तांचे कडल्यान कसलीच म्हायती मेळूंक ना. हाका लागून ही बसका येसस्वी जातली काय फिस्कटली हे विशीं उमळशीक आसा. आरजीचे मुखेली मनोज परब हांणी आमदार विरेश बोरकार हांचेर केल्ल्या आरोपांक लागून दोगां मदीं खर मतभेद निर्माण जाल्ल्याचें स्पश्ट जालें.

आरजीचे मुखेली मनोज परब आनी आमदार विरेश बोरकार हांच्या समर्थकां मदीं फाटले खूबशे दीस आरोप प्रत्यारोप सुरू आसात. फेसबूक पोस्टा वतीन हें झूज सुरू आसतना शेनवारा आमदार विरेश बोरकार हांच्या समर्थकांनी पत्रकार परिशद घेवन मडगांवां पक्षा विशीं बसका जाल्ल्याची म्हायती दिली. हाचे उपरांत आयतारा मुखेली मनोज परब हांच्या फुडारपणा खाला आरजीच्या कार्यकारी समितीची बसका जाली. हे बसकेक आमदार विरेश बोरकार गैरहाजीर आशिल्ले. बसकेंत जाल्ल्या निर्णयाची म्हायती मनोज परब हांणी सांजे पत्रकार परिशदेंत दिली.

पक्षाचे भांडारी अजय खोलकार, सरचिटणीस विश्वेश नायक आनी हेर पदाधिकारी पत्रकार परिशदेक हाजीर आशिल्ले.

पक्ष विरोधी कारवायो करपा खातीर ज्युलीयस आल्मेदा हांकां कारणां दाखय नोटीस जारी केल्ली. ताणें केल्ल्या पक्ष विरोधी कारवायेची म्हायती आमदार विरेश बोरकार हांकां लेगीत दिल्ली. तरी लेगीत विरेश बोरकार हांणी ज्युलीयस आल्मेदा हांचे कडेन बरे संबंद दवरपा सयत तांचे सयत भोंवप सुरूच दवरले. आरजीच्या केंद्रीय समितीन आपयिल्ले बसकेक लेगीत ते हाजीर रावले नात. ते भायर पक्षविरोधी कारवायो करपी वांगड्यांक ते तेंको दीत रावले. हाका लागून पक्षान विरेश बोरकार हांकां कारणां दाखय नोटीस जारी केल्या. हे नोटिशे विशीं तांची बाजू आयकून घेवपा सयत निर्णय घेवपा खातीर तांचे कडेन आयज (सोमारा) बसका जातली. आरजी पक्षांत फूट घालपाचे येत्न सुरू आसात. कांय जाण न्यायालयांत वचून आरजी ताब्यांत घेवपाचो येत्न करतात. आदित्य देसाय हे विशीं कायदेशीर सल्लो दिता. पक्ष ताब्यांत घेवपा खातीर मडगांवां कांय वांगड्यांनी बसका घेतली. पक्ष बरखास्त जावचो ना. आरजीचे अस्तित्व कायम उरतलें. येता ती वेंचणूक पक्ष पुराय तयारी करून लडयतलो, अशें मनोज परब हांणी सांगलें.

पक्ष विरेशाच्या ताब्यांत दिवपाक तयार

म्हजे सयत बऱ्याच जाणांनी घाम गाळून आरजी पक्ष स्थापन केला. पक्ष विरेशाच्या ताब्यांत दिवपाची म्हजी तयारी आशिल्ली. कसलेंच पद घेनासताना पक्षा खातीर वावुरपाक म्हजी तयारी आशिल्ली. वॉटसअॅपाचेर हांवें ताका मॅसेज धाडिल्ली. ताणें हाका प्रतिसाद दिलो ना, मात मडगांवां बसका घेतली. बसकेची खबर मेळ्ळे उपरांत कारवायेची प्रक्रिया सुरू जाली, अशें मनोज परब हांणी सांगलें.

पक्ष विरोधी कारवायो करतल्यां

कडेन पक्षाचो ताबो दिवचो ना

कांय जाणांनी हिंदू आनी क्रिस्तांव ह्या मुद्याचेर पक्षांत फूट घालपाचे येत्न चलयल्यात. कांय जाण न्यायालयांत वचून पक्ष ताब्यांत घेवपाचे येत्न करतात. हाका आदित्य दिसाय हे कायदेशीर सल्लो दितात. आदित्य देसाय हो दुसऱ्यांच्या नांवाचेर फेसबूक पेज चलयता. कांय जाण निधीच्या प्रस्नाचेर फूट घालपाक सोदतात. पक्ष विरोधी कारवायो करपी वा भाड्याच्या बैलांच्या हातांत आमी पक्षाचो ताबो दिवचे नात. तशेंच पक्ष विरोधी कारवायो करपी वांगड्यांचेर कारवाय जातलीच, अशें मनोज परब हांणी स्पश्ट केलें.

विरेशा कडेन पक्षा खातीर हांव रडलां

ज्युलियस आल्मेदा हाणें म्हजी आनी विरेशा मदीं फूट घालपाचे येत्न केले. आमी एक ना, हे दाखोवपाचो ताणें येत्न केलो. ताका पयस करचो म्हूण विरेशा कडेन हांव रडला. पक्ष विरोधी कारवायो करपी वांगड्यांक कांय तेंप आमी सांबाळून घेतल्यात. हांव डिप्लोमॅट न्हय. बरेंपण जोडप म्हज्या सभावांत ना. हाका लागून 6 ते 7 जाणांचेर पक्ष विरोधी कारवाये खातीर कारवाय करची पडली. जो कोण पक्ष विरोधी कार्य करता, तांचेर कारवाय हाचे मुखार लेगीत जातली, अशी शिटकावणी तांणी दिली.

विधानसभा कामगिरीचेर लक्ष दिवपाचो दिलो सल्लो

आमदार म्हूण विरेश बोरकार हाणें बरी कामगिरी केल्या. ताची कामगिरी विजय सरदेसाय हांचे इतली बरी जावची म्हूण हांवें ताका सल्ला दिल्लो. अधिवेशना वेळार हेर कार्यावळींनी वांटो घेनासतना फक्त अधिवेशनाचेर लक्ष केंद्रीय करचें, असो सल्लो ताका दिल्लो. विजय सरदेसाय हो सगल्या विशयांचो अभ्यास करून उलयता. अभ्यास करचो असो सल्लो ताका दिल्लो, अशें मनोज परब हांणी सांगलें.

कायद्या प्रमाण आरजीची साबार बसका जाता. खर्चाचे ऑडीट जावपा सयत कायद्या प्रमाण सगली म्हायती वेंचणूक आयोगाक सादर जाता, अशी म्हायती आरजीचे भांडारी अजय खोलकार हांणी दिली.