शाॅक बसपाचो आसा?

भांगरभूंय | प्रतिनिधी

प्रधानमंत्री, राष्ट्रपतीन दर म्हयन्याक खेडेगांवांत वचपाक जाय. कारण ते येतले म्हूण सगल्यो साधनसुविधा चकाचक करतात, अशें मजेन म्हणटात. तेच प्रमाण दर वर्सा विधानसभा वेंचणूक जावपाक जाय, अशेंय म्हणपी आसात. कारण दोन म्हयने पयलीं सगल्याच जिणेंगरजेच्या गजालींचें मोल गोठेता….. ही मात मजेची गजाल न्हय. वेंचणुको लागीं तेंकल्यो काय खरेंच अशें जाता. ल्हान – व्हड पक्ष मतदारांच्या विरोधांत पांयाचें बोट पसून उखलिनात. मात निकाल लागले काय ताका माड्डून मुखार वतात. हालींच वेंचणुकांच्या निकाला उपरांत सीएनजी, पेत्रोल, डिजेलाचें मोल वाडलें. आतां गिरायकांक लायटीचो शाॅक लागपाची भिरांत आसा. केंद्रीय वीज प्राधिकरणान म्हयन्याचो फिक्स चार्ज वाडोवपाचो प्रस्ताव मांडला. ताका लागून उणी वीज वापरपी गिरायकांचेंय बील फुगतलें. वीज तयार करपी कंपनींचें लुकसाण भरून येवपाक ही वाड मजत करतली, अशें प्राधिकरणाचें मत. व्हडलीं गिरायकां सौर ऊर्जा वापरतात, स्वताची वीज तयार करतात. ग्रीड फक्त बॅकअपा खातीर. चड वीज वापरप जायना खंय. सामान्य गिरायकूय युनिटा प्रमाण पयशे दिता. नेटवर्क साधनसुविधा, कर्मचारी, कामगार, नेटवर्क राखण हाचेर 40 ते 58 टक्के खर्च जाता, जाल्यार फिक्स चार्जांतल्यान फक्त 9 ते 20 टक्केच येणावळ मेळटा, अशेंय प्राधिकरण सांगता. घरगुती आनी शेतकी गिरायकां खातीर फिक्स चार्ज 25 टक्के मेरेन वाडोवचो असो प्रस्ताव दवरला, तर वेवसायीक, उद्देगीक गिरायकां खातीर 2030 मेरेन 100 टक्के खर्च वसुली जातली. अर्थांत ही दरवाड टप्प्या टप्प्यान जातली.
गोंयांत सध्या स्मार्ट मिटराचो बोवाळ चल्ला. समर्थक म्हणटात, ‘मिटर सामको बेस्ट, तर विरोधक म्हणटात, कितें तरी घुस्पागोंदळ आसा.’स्मार्ट मिटरा विशीं भौसाक सगलें कळपाक जाय. तो बसोवचोच, वांगडा केन्नाच लायट वच्ची ना, गेल्यार 10 मिनटां भितर येतली, हे खातीर ‘स्मार्ट यंत्रणा’ आसल्यार बसोवची. पर्यटन राज्य जाल्ल्यान नायट लायफ जगपाक पर्यटक येतात. म्हणटकच रातभर लायटीचो झगमग जाय. पूण बरेच कडेन (आल्तिन सोडल्यार) व्होल्टेज हालत आसता, वीज आपालिपा खेळटा, दोडामार्गार गडगडलें काय दिवचल, सत्तरी तालुक्यांत वीज आंग काडटा. तिका थातारता म्हणसर अर्दवर, एक वर, केन्ना एक रात पसून लागता. भाऊ, ताई सरकारा वेळा वयल्यो ह्यो समस्या अजून कित्याक सुटनात? बिलांत स्ट्रीट लायट खर्च, फिक्स चार्ज, हो सेस, तो सेस… ह्या सेसविधीक सामान्य मनीस त्रासला. कोणे कागाळ केल्यार गोंयचे लायटीचे दर देशांत सगल्यांत सवाय आसात, अशें सांगून ताचो फ्यूज उडयतात. वीज थीर नासली तरी बिल मात थीरपणान वाडत आसा!
जायत्या राज्यांतल्यो वीज वितरण कंपनी लुकसाणांत आसात, ही गजाल खरी. कारण विजेची, वीज सामानाची चोरी, मुफत वीज येवजण्यो, थकबाकी, राजकी हस्तक्षेप. हाका लागून कंपनीं वयलें अर्थीक वजें वाडलां. फिक्स चार्ज वाडोवपाचो प्रस्ताव दिला, कारण गिरायकान उणी वीज वापरली तरी वायर, कर्मचारी, देखभाल, ट्रान्स्फाॅर्मर हांचे वयलो खर्च उणो जायना, अशें वीज कंपनींचें मत, तर गिरायक म्हणटा, वापर उणो तर बिलूय कमीच येवपाक जाय. ताका लागून हो मुद्दोच वादाचो थारला.
वीज खात्यान विजेची चोरी जावची ना, हें पळोवंक जाय. वीज यंत्रणा आधुनिक करपाक जाय, सौर उर्जेचो वापर वाडोवपाक जाय. मुफत वीज येवजण आसल्यार अनुदान सरकारान थेट गिरायकाक दिवपाक जाय. ताचें वजें वीज वितरण कंपनीचेर पडपाक जायना. थळाव्या पांवड्यार वीज निर्मिती जायच. अर्थांत गिरायकांचो पालव म्हत्वाचो. गरज नासतना वीज वापरप बंद केल्यार पसून खूब- खूब फायदो जातलो!!